İroni Yolə Rəhbər: Suriyə qıləy beynəlxalğə canqədə səbarz bıə.

İroni Yolə Rəhbər qılıy beynəlxalğə canqi ğolibədə Suriyə millət və nizomi muğavimət iyən səbarzətiş çı Suriyə etebor, abru-həyo və baxtəvərəti əlovə bey amil bə hisobış varde.

Bə İroni Yolə Rəhbəri məlumatərosnə mərkəzi raporti əsos, İroni Yolə Rəhbər Həzrəte Ayətullah Xamenei zinə de Suriyə prezident Bəşar Əsəd və de çəy bə ico bıə heyəti vindemoni cərəyonədə bə siyosi iyən hərbi meydonədə Suriyə yolə mıvəffəğiyəton işorəş karde və votışe: ısətnə Suriyə canqiku bənav bıə Suriyə ni, əqəçı nakonə zəmonədə xərobion nıbin əmmo ısət Suriyə ehterom iyən etebor nakonə zəmoniku vey ziyod bıə iyən həmmə kişvəron bəy bənə qıləy yolə ğudrəti diyə kardeydən.

Həzrət Ayətullah Xamenei bə məntəğə milləton nəzdədə bıə Suriyə millət iyən dıvləti barzə vırə işarəş karde iyən əlovəş do: məntəğə bəzi kişvəronku rəhbəron, de sionist rejimi eşt-nışt kardən iyən de yande ğəhvə peşomedən, əmmo həminə kişvəronku milləton Ğuds beynəlxalğə rujədə ıştə kişvəri xiyobonon de cəmiyət iyən anti sionist şuaron pur kardən və ın çı məntəğ ımrujnə həğiğəte.

İroni Yolə Rəhbər ijən şəhid Ğasim Suleymani yodi yol qətşe və hamiyəşe: ə bozorqvarə şəhid bə Suriyə vey məxsus təəssıbış be iyən həğiğətən fidokorəti əkardi, andədə ki Suriyədə çəy rəftor de İronədə 8 sornə mığəddəsə mudafiyə cərəyonədə bıə rəftoron farğış nıbe.

Ə həzrət əlovəş karde: şəhid Suleymani və Sepah təşkiloti co barzə şəxsiyəton əcumlə şəhid Həmedani həğiğətən dıştə con iyən dıli cəhd kardedə bin və bə Suriyə məsələ bənə qıləy vocibə muğddəsə koy diyə əkardin.

Həzrət Ayətullah Xamenei Suriyə vədə bıə bəzi kişvəron tərəfo tojədən de Suriyə dustiyəti kardey koon və hərəkəton işarəş karde iyən votışe: bəpe nakonə təcrubəonku dərs qətə bıbu ta taleədə strateqiaon oşko iyən ruşin bıbu.

İroni Yolə Rəhbər çı Suriyə prezidenti çokə ruhiyə iyən zumandə şəxsiyəti yolə koon əncom doe zəminə zınəş be və votışe: İroni prezident iyən dıvlət həm həğiğətən barzə ruhiyə iyən irodəşone və bə Suriyə məsələ de cəhd-ənqizə diyə kardən ki bəpe həminə fırsətiku 2 qılə kişvəri miyono həmkarion çimi sə inkişof doeyro istifodə bıbu.

Suriyə prezident həm İroni millət və dıvlətihimoyəonku ğdrdonətiş karde və de şəhid Suleymani yodi əziz qətey votışe: muxtəlif məsələon bardədə dəvardə 40 sori mıddətədə bıə İroni zumandə vindemon iyən mıvğiyət qətey xususi Fələstini barədə nışoş do ki İroni roy dırıst iyən əsosə roy heste.

Bəşar əsəd əlovəş karde: canqiku baği mandə xərobion obdon karde bəbe, əmmo əqə prinsipon məhv və xərob bıbu əvoni ijən soxte nibəbe, bə İmom Xomeyni prinsipon sə İroni milləti mandey ki de Həzrət Xameni rəhbəriyəti dəvomış be İroni və məntəğə milləton xususi Fələstin milləti səbarzəti bois bəbe.

Suriyə prezident təsdiğış karde: kalion jığo təsəvvor kardən ki muğavimət cəhbəku İroni himoyəon, silohinə himoyəonin, və hol ım ki İroni nizomi tərəfo vey muhimmə himoyə və komək, muğaviməti ruhiyə cari karde və çəy dəvom be iyən ım çı İron və Suriyə strateqiya be ki məntəğədə sionist rejimi hakemiyəti vəy qəte bois bıə.