Suriyədə sərmoyə noey fırsəton istifodə kardeyro, Tehron- Dəmeşği muzakirəon
İroni heyət, Suriyə rəsmi şəxson muzakirəondə, sərmoyə noey zərfiyəton və fırsəton, əctiv kardey iyən Tehron-Dəməşğ iğtisodi rabitəon bə inkişof rəsey barədə muzakirəşon karde.
Bə İrna raporti əsos, Suriyə və İroni iğtisodi rabitəon bə inkişof rosniyə kamisiya rəis, Əbbas Əkbəri iyən dəy de bə ico bıə heyət ki bə Suriyə cənub ğərb, Tərtus şəhri səfərış kardə, İroni sərmoy noey fırsəton barədə de Suriyə ostani rəsmi şəxson muzakirəşon be.
Həminə vindemonədə Tərtusi ostandar Səfvan Əbusəidi, ım ostani muxtəlifə baxşonədə, bə sərmoyə noey iyən mıştərəkə mənafe təmin kardey cəhətədə, 2 qılə kişvəri miyono iğtisodi həmkarion bə inkişof rosniye vey yolə fırsətonku istifodə kardey, işorəş karde.
Əbusəidi həmçınin votışe ım iclosədə bə vey muhimə fikon işorə bıə və bə istehsoli keyfiyət təkid bıə, ta karde bıznəmon vıjorədə vey çokə məhsul istihsol bıbu.
Suriyə və İroni iğtisodi rabitəon bə inkişof rosniye jamissiya rəis, Əbbas Əkbəri həm votışe: ım səfəri muhimmə hədəfon: 2 qılə kişvəri iğtisodi rabitəon zumand kardey iyən bə inkişof rosniye, İronədə mıvcudə elmi enkişofinə zərfiyətonku istifodə kardey və Suriyə iğtisodi bə inkişof rosniyero əvoni bə Suriyə ovoştoniye.
Həmçınin Tərtus sənaye və ticari palata uzvonku qıləyni həm iğtisodi ko əktiv kardeyro, kali təklifon bəyonış kardə əcumlə: 2 qılə kişvəri miyono ixracəkəyon və taciron həx-huğuği qarantiya, əmtəə birjə metodonku xususi kaştemoni məhsulonku himoyədorəti kardey və mali və banki mıştərəkə kanali imkoni icod kardey.
