Kuveytədə İroni səfir: məntəğə əmniyyət de sionist rejimi vositə, məhv bıə.

Kuveytədə İroni səfir votışe: məntəğə əmniyyət də sionist rejim iyən xarıci kişvəron mıdoxilə vositə, məhv bıə.

Kuveytədə İroni səfir Muhəmməd İrani, de ım kişvəri Əlrəey rujnomə votımonədə əlovəş do: məntəğə və beynəlxalğə məsələon barədə, İron İslam Respublika de dustə kişvəron məşvərət iyən nəzəon vey muhimm iyən zərrori zıneydə, xususi ım ki ım rabitəonədə 2 qılə kişvəri rabitəon vey muhimmə vırəon bə hisob omeydən.

İroni votışe: İroni 13 minnə dıvlətədə, əlovə bə İroni xarıci vəzir Husein ƏmirƏbdullahiyan və Kuveyti xarıci vəzir Əhməd Əlnasır Əlsəbah miyono mıstəğimə vindemon, çand qılə telefoniyə rabitə həm əncom bıə ki nışoş do 2 qılə kişvəri miyono rabitəon vey muhimmin.

İroni xarıci vəzir de Şeyx Əhməd Əlnasıri tojə rabitədə, çəyku dəvətış kardə ki bə Tehron səfər ko iyən votışe: 2 tərəfiyə rabitəon royədə təhəvolatonku vey rozi hestimon.

Kuveytədə İroni səfir ijən bə Amerkə rəsmi şəxson tojə bəyanaton ki votəş be məntəğədə İroni mıdoxiləon mıvcude işorəş karde iyən votışe: məntəğə kişvəron millət və rəsmi şəxson, Amerkə rəsmi şəxson çand kərə ittihamonku oqıniyə bıən və bə ım be əsosə sıxənon adət kardən.

Im İroni diplomatiya əlovəş do: İron İslam Respublika çand kərə de rəsmi iyən ğəyre rəsmi surət elanış kardə be ki nə fəğət məntəğə kişvəron koonədə mıdoxiləş kardə ni, bəlkəm  daveon məhv kardey siyasət, de hamsuyə kişvəron rabitəon bə inkişof rosniye iyən mıştərəkə həmkarion bənə İroni xarıci siyasəti i minnə hədəfon bə hisob omeydən.