Dəməşği Zeynəbiyədə Həzrəte Zeynəb(s) milad ruji mərosimon.
Həzrəte Zeynəb(s) milad ruji mərosimon Dəməşği Zeynəbiyədə bıə Xanımi hərəmi musəlloədə bərpo be.
Bə İRNA raporti əsos, həminə mərosimədə ki de İroni Yolə Rəhbəri nımoyəndəti zəhməti bərpo bıə çandə dini, mədəni iyən hərbi şəxsiyəton ijən Suriyə şahrvandon iştirokışon be.
Lvani Hizbullah təşkiloti mədəni koon yol Şeyx Əkrəm Diyab zinə ruji mərosimədə bə Həzrəte Zeynəb(s) fəziləton işarə kardeyro çandə nıtğonış be.
İşidi bə Xanım Həzrəte Zeynəb(s) pkə hərəmi həmlə kardey iyən hərəmi mudafiyə kardə əsqəron fidokorətionku filmon nışo doe əcumlə ın mərosimi co baxşon be.
4şənbə miladi 2022 minnə sori Noyabri 30, hicri ğəməri 1444 nə sori cəmadiuləvvələ manqi 5 nə ruj iyən Həzrət Zeynəbe Kobra(s) moəku bıə ruji sorəqardış be.
Həzrət Zeynəb(s) totixədə bo həmmə ozodəti tələb əkə iyən de zılm mubarizə bardə jenon və merdonro olqo be.
Həzrəte Zeynəb(s) ıştə əzizə bıvə, dınyo şiəyon 3 minnə imom Həzrət İmom Huseyn(ə)-i kənoədə de mıtəhəcir və mınhərifə cəmaəti mubarizəş karde, həmonə bebəsirətə cəmaət ki de islamiku mudafiyə karde pesoxtə iddio və nomi Kərbəlo yolə faciəşon icod karde.
Xanım Zeynəb(s) bo həmmə zəmon və dovrani qıləy xanım be, boçi ki Həzrətədə insoniyə kəromət, Xıdo roədə bandəçiyəti, ədolət tələbi iyən şərafət və ozodəti, həmonə erjonku bə hisob varde bəbe ki bə qıləy məxsusə zəmon ya ictimaiyyəti məxsus ni.
Həman hırdənəti faxtiku Həzrəte Zeynəb Kobra(s) vıcud ha ruj çı islam əzizə rəsul(s) çokə əxlağ və mərefətiku tojə conış əqəti, Im xanım ıştə əzizə dədə dınyo şiəyon 1 minnə İmom Həzrət Əli(ə)-i elm və bəloğətiku istifotəş karde iyən Zeynəbi ruf çəy əzizə inə Xanım Fatimə(s) məhəbbətinə dovnədə bə oroməti rəse.
Im qiromi xanım, Həzrət imom Huseyn(ə) şəhodəti bəpeştə, bo dınyo şiəyon 4 minnə imom Həzrət imom Səccad(ə) coni mudafiyə kardeyro ıştənış məsul bə hisobış varde, boçimi xoto vey saxtə şərayetədə cinayətkaron və sitəmqəron vədə mande iyən Həzrəti kənoədə dıştə zumandə sıxanon islam deşmenon rısvoş karde.
