Əmirəbdullahiyan: israili rejim, məntəğə əmniyyətiro ciddiyə təhdide

İroni xarıci vəzir, sionist rejimi ğeyri ğanuni iyən pesoxtə bıə rejim və məntəğə əmniyyətiro ciddiyə təhdid zıneydə.

Sioniston bəştə bə inkişof rəsə hədəfon dast peydo kardeyro, har ruj bə Fələstini muxtəlifə məntəğəon həmlə iyən Fələstinıjon şəhid, zəxmin və ya dastqir və zindoni kardedən.

Həminə cəhətədə, və bə Tele-Rədio aqentiyəti raporti əsos, İron İslom Respublika xarıci vəzir, Huseyn Əmirəbdullahiyan ıştə Tvitterədə bə ım nuktə işorəş karde ki israili ğeyri ğanuni və pesoxtə bıə rejim işğolçi və cinoyətkore iyən çand sa qılə atom bomba soybe, əv ijən nıvıştəşe: Telaviv çəmə mıştərkə məntəğə əmniyyətiro qıləy ciddiyə təhdide.

Əmirəbdullahiyan ijən təkidış karde: beşək, vəomey Fələstinii nəcibə milləton soybe.

Çand ruj çımiku bənav həm: İroni xarıci vəzarətxonə sıxənəvot, Nasır Kənani Çafi həm ıştə Tvitterədə sionist rejimi cinoyətonədə Amerkə, İnqilis, Fransə və Almaniya vey məsul zıneydə iyən təsdiğış karde: ım rejimon bəpe mıttəhəmi vırədə cəvob bıdən.

Kənani ijən nıvıştəş be: qıləy ruj ni ki de sionist apartayd rejimi vositə, Fələstini cıvonon, nocıvonon və hırdənon şəhid, zəxmin bey və ya əsirətiku aləm xəbədo nıbu.

70 soriku vey bəbe ki fələstini məzlumə milləti həxon ki de sionisti işğolçiyə rejimi hərbiçion vositə poymol bıdə, iyən har ruj və bə beynəlxalğə təşkiloton sukuti xoto, ım pesoxtə bıə rejimi rəsmi şəxson vey beədəb bıdən.