Suriyə hərbiyə ğıvvon bə Tədmor varid bən.

Suriyə xəbəriyə mənbəon elanışon kardə ki çın kişvəri hərbiyə ğıvvon çandə şiddətinə daveon bəpeştə muvəffəğ bən Suriyə ğərb hissədə bıə Homs ostanədə Daeş terroristiyə qrupi məğlub bıkən ijən bə Tədmor şəhri mərkəz varid bıbon.

Suriyə hərbiyə ğıvvon çımiku bənav muvaffəğ bıə bən ki çın şəhri məşhurə tarixiyə vırə yəni şəhri mərkəzədə Palmira tarixiyə ğələ ozod bıkən.

Daeş terroristiyə qrup 2015 minə soriku Tədmor şəhri işğal kardə be və hol ım ki ım tarixiyə şəhr çı Yonesko təşkilati siyahədə bənə qıləy yolə erjinə tarixiyə vırə ğeyd bıə be.

Daeş terroristiyə qrup ım şəhrədə bıə çandə kanə tarixiyə əsəronış xərobə və ğarət kardə be.

Suriyə hərbiyə ğıvvon çımiku bə nav dəvardə sori jıqonə rujonədə həm ım şəhri ozod kardəşon bən ki ujnən de Daeşi dustə kişvəron koməki işğal bıə be.

Xəbə omə ki şəhri ətrofədə ujnən daveon dəvomış heste.

Suriyədə bohran 2011 minə soriku və de Daeşi pesoxtə bıə terroristiyə qrupi uzvon bə Suriyə daxil karde bino be.

Siyonist rejim, Amerkə və bəzi co ğərbiyə kişvəron həmçınin Tırkiyə, Ğətər və Ərəbiston iyən bəzi co ərəbiyə kişvəron hədəf Suriyədə canqi otəşi rost kardeku Bəşşar Əsəd və mığuvimət cəhbə məhv karde be.