Suriyədə buməlarzə dumoədə, İron və Suriyə xarıci vəziron telefoniyə votımon
İroni xarıci vəzir, de Suriyə xarıci vəzir telefoniyə votımonədə, ım kişvəri buməlarzə dumoədə, İroni millət iyən dıvləti hamdardi de Suriyə millət iyən dıvləti elanış kardə.
Zinə Dışəmbə sıb, qıləy buməlarzə bə 7.8 rişter yoləti, Tırkiyə cənub iyən Livani şərğ və Suriyə şimol kişvəron larzedə. Həminə buməlarzə cərəyonəəd ki tosə bə ısət çand həzo nəfər ğıboni bıən, bə binaon həm veyə zərəl-ziyanon varid bıə.
Bə oxonə xəbəon əsos, tosə bə ısət həminə buməlarzə kıştə bıə kəson mığdor, Tırkiyədə bə 1541 nəfər, Suriyədə bə 911 nəfər və zəxmin bıə kəson mığdor Tırkiyədə 9733 nəfər və Suriyədə bə 2426 nəfər rəsə.
Həminə buməlarzə cərəyonədə həmçınin bə binaon veyə zərəl-ziyon varid bıə iyən nicot komanaon həmonə kəson ki binaon jinədə mandən, nicot doey holədən.
Bə xarıci vəzarətxonə sıxənəvoti koon iyən məlumatərosnə idorə raporti əsos, zinə şəv İroni xarıci vəzir Huseyn Əmirəbdullahiyan de Suriyə xarıci vəzir Feysəl Meğdadi telefoniyə votımonış kardə iyən ım buməlarzə ki Suriyə şahrvandonku veyə mığdori kıştə bey bois bıə, bə Suriyə dıvlət iyən millət təsliyət votışe və bə Suriyə bəşərdustə koməkon iroə doeyro İroni hozzoətiku xəbəş do.
Əmirəbdullahyan ijən İron İslom Respublika prezidenti hamdardi bə Suriyə millət iyən dıvləti elanış kardə.
Suriyə xarıci vəzir Feysəl Meğdad həm de Suriyə millət iyən dıvlət, İroni prezident iyən xarıci vəziri həmdardi kardeyku ğədrdonətiş kardə iyən votışe: İron və Suriyə bənə 2 qılə dust iyən bıvə kişvəronin ki həmişə şo iyən norohətion de yande kənoədə hestin.
Əmirəbdullahiyan həmçınin Dəməşğədə de İroni səfir və Hələbədə de sərkunsolqəri təmosi vositə, koəkəyon səloməti cərəyonədə ğərorış qətə iyən İroni sıə hiloli cəmiyəti tərəfo bə təcili hərəkəton əncom doey işorəş karde iyən bə Suriyə və Tırkiyə buməlarzə vində məntəğəon tib iyən nicot rosniye komandaon vığandeyro bə həmohənqion vey rə əncom doey təkidış karde.
