Rəyisi: mısılmonə kişvəron rəhbəron, islomi umməti vəhdəti bə vırə rosneydən

İron İslom Respublika prezident qıləy mesajədə bə Yəməni siyasi ali şura rəyis, bə islomi umməti vəhdəti bə vırə rosniye təkidış kardə.

Bə İrna Dışəmbə ruji raporti əsos, İron İslom Respublika prezident, Seyd İbreym Rəyisi qıləy mesajədə bə Yəməni siyasi ali şura rəyis, Məhdi Əlmoşat, Rəməzon mıburəkə manq, təzkiyə, ibodət, ıştəni umutey və ozodi manq zınəşe və Yəməni millət, mısılmonon və həmmə kəson ki həxi royədə qəm peqətey holədən hevujəti və inkişof urzoş kardə.

İron İslom Respublika prezident ıştə mesajədə təkidış kardə ki İslomi kişvəron bəpe Rəməzon mıburəkə manqədə de bə Ğıroni təlimon təkyə kardey və bə ım xəy iyən bərəkətinə manqi mənəviyəton bəfodor mandey vositə, islomi umməti vəhdəti bə vırə bırosnon.

Rəyisi ijən təsdiğış karde ki həmmə mısılmonon bəpe ım royədə de mıştərəkə qəmon iyən cəhdon vositə, dınyoədə İslomi nomi barz kon.

Oxonə soron təcrubəon vey çok nışoş do ki deşmonon həmişə cəhd kardedən mısılmonon həğiğiyə ozodi və istiğloli mande bıbun və ım royədə muxtəlifə əbzaronku istifodə kardışone. əcumlə bə mısılmonon ələyh mediya mənfiyə təbliğaton, islomi fobiya əlovə kardey, bə radikalizm və terrorizm mısılmonon mıttəhəm kardey və həmçınin muxtəlifə məzhəbon tərəfdaron miyonon ixtilof icod kardey.

Vey oşkoe ki vaxti mısılmonon miyono ixtilof icod bıbu, bə ali hədəfon və urzoon əcumlə istiğlol və inkişof rəsey imkonış ni.

Kərimə Ğıron bə mısılmonon təklif doəşe ki vəhdəti bə dast vardeyədə cəhd kənən boçi ki İslom həmmə mısılmonon vahidə ummət zınəşe və mominon deyande bıvə hestin, peşo kali məsələonədə ixtilof islomi bıvəti və mısılmonon vəhdətiro mane nibəbe. De ım vəhdəti bə vırə rosniye, islomi ummət, islomi tojə sivilizasiya icod bey royədə ğəror qətedə ki ım həmmə mısılmonon vəhdəti nışonəy.