Rəyisi: Fələstini milləti həxon qəteyədə İslomi kişvəron həmkoəti vey təsirış heste

İron İslom Respublika prezident de Omani sultani telefoniyə votımonədə Fələstini milləti həxon qəteyədə İslomi kişvəron həmkoəti vey təsirin zınəşe.

Bə prezidenti məlumatərosnə mərkəzi raporti əsos, ,İron İslom Respublika prezident, Seyd İbreym Rəyisi de Omani sultan Hisem İbne Tareğ Ale Səid telefoniyə votımonədə,bə Omani devlət və millət navbənav fitrə idi təbrik votışe və İroni xarıci siyasətədə bə de Omani rabitəon vırə işorə və 2 qılə kişvəri miyono muğaviləon icro bey təğib kardışe.

Rəyisi həmçınin bə Fələstini be mudafiə rujə əqəton ələyh sionist rejimi vəhşiyə cinoyəton və təcavuzon məhkumış kardə və votışe: be şək islomi həmmə kişvəron həmroəti, həmfiki və həmkoəti sioniston təcavuzon məhv kardey və Fələstini milləti ğanuniyə həxon qəteyədə təsirış heste.

Ommani sultan Hisem İbne Ale Səid həm ım telefoniyə votımonədə de İron İslom Respublika rabitəon səthiku ıştə rizoyəti nışoş do və bə 2 qılə kişvəri miyono təvafuğon icro bey təkidış kardə, həmçınin Məçituləğsa be ehtıroməti kardeyədə sionist rejimi hərəkəton məhkumış kardə və votışe: Oman həmişə Fələstini məsələ həxədə tosə Fələstinıjon ğanuniyə həx bə vırə rosniyey, bəştə sıxən təkidış bəkarde.