Rəyisi: sioniston ıştə əmniyyəti təmin kardey zuşon ni

İron İslom Respublika prezident Seyd İbreym Rəyisi votışe: dəvardə zəmoni muğaisədə şəroyet farğış peydo kardə və sionist rejim işğal bıə sərzəminonədə ıştə əmniyyəti təmin kardey əzı niş.

Bə İran Peres aqentiyəti raporti əsos, de Livani Əlməyadin kanali mısohibədə, Seyd İbreym Rəyisi bə sionist rejimi daxıli muşkilaton işorə və əlovəş kardə: ımruj muğaviləoni bənə Şərmoşşeyx, Oslo və Kəmp Deyvid karde zınəş ni ki ım rejimiro əmniyyəti icod bıko, ımruj ğərol Fələstini mıcohidon dastədəy nə siyasi muzakirəon mizi sə.

Əv İroni mudafiə və hərbi zumandəti barədə votışe: mudafiə və hərbi zumandəti baxşədə nə fəğət bə ıştəni təkyə kardey səth rəsəmone bəlkəm mudafiə sənaye baxşədə bə məşhurə kişvəronku qıləyni əvəz bıəmone.

Rəyisi ijən təkidış kardə: dəvardə 44 sori mıddətədə deşmon bə hiç sərsəğəti dast jəş ni ım məsələ nə bə ım xotoe ki bə ım ko dumoədə nıbe bəlkəm bə ım illəte ki bə ım ko əncom doey əzı nıbe.

Əv həmçınin bə sionist rejimi puçə təhdidon işorəş kardə iyən votışe: ım rejim vey çok zıneydə ki hiç vaxt de İroni muğabilə kardey zuş ni.

Rəyisi həmçınin ıştə sıxənon co qılə baxşədə bə Şanxay həmkoəti təşkiloti İroni əlovə bey işorəş kardə və votışe: ım hərəkət de Asiya strukturon İroni həmkoətion zəminə icod kardedə və əmə həmçınin hozzoimon ki Briks qrupədə həm uzv bıbəmon.

Əv İron və Ərəbistoni rabitəon muzakirəon barədə əlovəş kardə: məntəğədə İron və Ərəbiston 2 qılə təsirinə kişvəronin və çəvon miyono rabitəon de veyə foydəon bə icoe.

Rəyisi həmçınin votışe: deşmonon xususi telzaviv rejim ım rabitəku ıştə vızməti nışo doşone və çəy nışonə həm ıme ki ixtilof və təfrəğə icod kardeyro ıştə həmmə cəhdon əncom dodən.

Rəyisi həmçınin Fələstini sərnıvışti barədə əlovəş kardə: Fələstini sərnıvışt de Fələstini mıcohidon və milləti ğərol və irodə təyin bəbe və ım fəğət siyasi muzakirə mizədə təyin nibəbe.