Yəmənədə Ərəbıstoni canqiyə cinoyəton həmçınan dəvomış heste.

Bəşər huğuğiyə vəziyəti diyə əkə təşkilat Yəmənədə Ərəbıstoni Avyasiya hucumi bənə canqiyə cinoyəton hisobış kardə ki vey ğeyri hərbion ğətleami boyis bıə.

Bə İsna aqentiyəti raporti əsos: i bıə milləton təşkilatədə insonə həxon Afrika Şimal və nızə şərğ şobə diyə əkə icma mudir Əhməd bın Şəmsi bə həminə raporti işorəş karde bə peştə təsdiğış kardə ki Yəmənədə vəziyət ısət bənə qıləy insoniyə faciə heste ki çın kişvərədə 3 milyon nəfəri avarəti ijən dəvo-damon və xorəkiyə humanitarə koməkən vəziyəti bevəc və qonış kardə.

Əhməd Bın Şəmsi bə FAO təşkilati raporti işorəş kardə və votışe: dınyoədə və xorək vəziyəti xoto Yəmən ısət vey bohranon və dəhşətin vəziyəti xıvande ki har 5 nəfəriku i nəfər vəşiyan mandə.

Çı insonə həxon diyə əkə təşkilati nızə şərğ və Afrika Şimal məntəğə mudir Yəmənədə insonə həxon vəziyəti vey bohranin hisobış kardə ijən Yəməni problemonədə şərik bıə kişvəronku tələbış kardə ki vey rə Yəməni şərayeti çok kardero cəhd bıkəmon.

Bə Yəməni milləti əleyh çı Ərəbıstoni hucumi nəticəku detosə bə ısət 11 hezo nəfər kışte və 20 hezo nəfər həm zəxmin bıən.

Tojədən bə Yəməni qıləy vıjorədə çı Ərəbistoni hucumi nəticəku ijən 26 nəfər kıştə və zəxmin bən.