Xalid Ğodomi: İroni İslomi İnğilobi təsir, bə Fələstin ruşine

İronədə bıə Fələstini İslomi muğaviməti hərəkəti (Həmas) nımoyəndə də işorə bə Fələstini islomi inğilobi təsir votışe: İslomi İnğilobi səbarzəti bəpeşt, İroni kişvər, Fələstin, Suriyə və İraği dust və Amerkə və israili deşmon bıə.

İroni islomi İnğilobi bəpeşt soronədə, Fələstini milləti hədəfonku himoyə kardey bənə İslomi Respublika xarıci siyasəti iminnə koon və stratejikə vırə soyb be.

İron İslom Respublika həmçınin beynəlxalğ və məntəğə iclosonədə, sionist rejimi vədə, Fələstini milləti muğavimət və çəvon milləti həxonku mudafiə kardedə və həmmə dınyoku tələb kardedə ki Fələstini milləti ğanuniyə həxon rəsmi bıznon.

İron İslom Respublika nəzəku Fələstini bıhroni yeqanə hələkə roy, de ım sərzəini vey muhimmə sakinon iştiroki və həmkoəti vositə referandomi bərpo kardeye və bə sionist rejimi əhd darşiye və terroristiyə zoti xoto, ım rejimi vədə Fələstinıjon yeqanə roy, muğaviməti dəvom doeye.

Bə İrna raporti əsos, İronədə bıə Həmasi nımoyəndə, Xaled Ğodomi bəyonış kardə ki İslomi İnğilobi bəpeşt, İmom Xomeyni(r) elanış kardə ki sionist rejimi səforətxonə bəpe İroniku bışo və ım səforət Fələstini səforəte, ijən votışe: udsi beynəlxalğə ruj, qıləy çokə adətonku be ki İmom Xmeyni(r), ım ruji plan kəşə be və ım inğilobi şəxsiyəti məno, İroni-İslomie.

Ğodomi Ğərbi Asiya muğaviməti ufuğon və israili məhv bey royədə sionist rejimi daxıli bıhronon barədə həm təsdiğış kardə: Ğərbi Asiya milləti muğavimət, Ğəzzə milləti muğavimət iyən co qılə vırəonku farğ kardedə.

İronədə bıə Həmasi nımoyəndə ijən əlovəş kardə: bə cinoyətkorə sioniston ələyh, Fələstini ğıvvon və cıvonon jəğo fərdi əməliyoton əncom dodən ki bənə təlim vində ərtışi mubarizə kardedən.

70 sor veye ki Fələstini məzlumə milləti həxon de sionist rejimi hərbiçion vositə məhv bey holədəy və ım pesoxtə bıə rejimi rəsmi şəxson, bə beynəlxalğə icmaon sukuti xoto, har ruj vey beədəb bəben.