Nablusədə Fələstini muğaviməti ğıvvon bə sionist rejimi hərbiçion həmlə kardışone

Nablusi ğərbədə Fələstini muğaviməti ğıvvon bə sionist rejimi hərbiçion qullə ğandışone.

Har ruj sionist rejimi hərbiçion bə muxtəlifə bəhonəon Fələstini məzlumə millət şəhid, zəxmin və ta dastqir kardedən, Fələstinıjon həm bə ım cinoyəton cəvobədə və bə sioniston ələyh əməliyot əncom dodən.

Bə Fələstini Şəhabi aqentiyəti raporti əsos, Fələstini muğaviməti hərbiçion, Nablusi ğərbədə  Şafi Şemron nomo sionisti qədə şəhəri nezədə bə sionist rejimi hərbiçion həmlə kardışone. Fələstini muğaviməti hərbiçion həm ım həmlə bəpeşt de muvəffəğiyəti bəştə vırə sakın bey obəqardən.

Co tərəfiku həm işəmbə sıb həm sionist rejimi hərbiçion bə Yəebəd qədə şəhr ki Cənin şəhri cənub ğərbədəy həmlə və de Fələstinıjon dave kardışone.

Yəebəd qədə şəhrədə Fələstini muğaviməti ğıvvon sioniston həmlə vədə muğavimət kardışone və bə sionist rejimi hərbiçion qullə ğandışone.

Çımiku bənav Milodi dəvardə manqədə həm  sionist rejimi 7 minnə kanal raportış doə be ki işğal bıə Ğuds və ğərbi sahilədə 124 qılə əməliyot əncom bıə .

Aprelə manqədə və ğərbi sahili daveon dumoədə, 3 qılə sionist rejim kıştə və 41 nəfər həm zəxmin bıən və 11 nəfər Fələstinıjon həm şəhid bıən.