Ğəribabadi: sionist rejimi cinoyəton oqəteyro, bəpe beynəlxalğə ictima hərəkət bıko

İroni bəşər həxon ğərorqoh sərkatib, beynəlxalğə təşkilaton rəsmi şəxsonku tələbış kardə ki Ğəzzədə sionist rejimi cinoyəton oqəteyro hərəkətoni əncom bıdə.

Bə Ğəzzə tanqə jimoni vırəon sionist rejimi vəhşiyə həmləon bə 4 minnə befosilə haftə varid bıə iyən bə Fələstini səhiyyə vəzorətxonə elani əsos, tosə ısət təğribən 9 həzo Fələstinıjon şəhid bıə ki ım miğdoriku nimə məzlum və be mçudafiə hırdənonin.

Bə Tele-Rədio aqentiyəti raporti əsos, Tehronədə "bə Fələstini məsələ iyən Ğəzzə sionist rejimi huğuğiyə baxşon təğib kardey" iclosədə İroni bəşər həxon ğərorğoh sərkatib Kazım Ğəribabadi bəyonış kardə: Ğəzzə dəvardə rujon hodisəon vey ğəmqine əv ijən əlovəş kardə: bə beynəlxalğə huğuğon əsos, daveonədə bəpe bə ğeyri hərbiyon həmlə əncom məbu.

Ğəribabadi ijən əlovəş kardə: dəvardə rujonədə kali beynəlxalğə təşkilaton rəsmi şəxson, ıştə məsuliyəti əncom doey əvəzi, 2 tərəfiku tələbışon kardə ki ıştəni oqəton.

Qıləy holədə ki 2 tərəfi vəziyət farğ kardedə.

İroni bəşər həxon ğərorqoh sərkatib ijən işorəş kardə: ım canqədə itərəf işğolqəre iyən itərəf bəştə həxi rəseyro cəhd kardedə, əv ijən votışe: insoni həxon və beynəlxalğə təşkilaton məsuliyət ıme ki işğolçiyə tərəfi təziği jintonədə ğəror bıdən ta ıştə işğolçiyəti bə oxo bırosnon, nə ım ki pidəşon bıbu əvon ıştəni oqəton.

Ğəribabadi ijən bəyonış kardə: de ım vecud ki təğribən 1 manq dədəvardedə və təğribən 9 həzo Fələstinıjon şəhid bıən,1 qılə insoniyə həxon iztirori iclos həm bərpo bıə ni, əv ijən təsdiğış kardə: ehanə insoni həxon təşkilaton ısət karde zınəşon ni ki ım cinoyəton və təcavuzon vəy bıqəton, çən karde zınəşone kom ko əncom bıdən?