Anrova: Ğəzzədə har 10 dəğiğə 1 nəfər hırdən şəhid beydə

Fələstini avarəonro ko icod kardey və komək rosniye beynəlxalğə təşkilot elanış kardə: Ğəzzədə har 10 dəğiğə 1 nəfər hırdən şəhid bəbe.

Bə Fars aqentiyəti raporti əsos, Fələstini avarəonro ko icod kardey və komək rosniye beynəlxalğə təşkilot qıləy raportədə elanış kardə: bə Ğəzzə tanqə sionist rejimi dəvomin və mislış nıbıə bombardımoni sayədə ki Oktiyabrə manqi 7 minnə rujiku bino bıə və tosə ısət həm dəvomış heste, miyonə hisobi har 10 dəğiğə 1 nəfər Fələstinıjə hırdən şəhid bəbe və 2 nəfər hırdən həm zəxmin bəben.   

Anrova ıştə raportədə işorə bıə ki ım daveon cərəyonədə ğeyri hərbiçion oqətey və mıhofizə kardey nə qıləy urzu ya idealə hədəf heste bəlkəm bəşəriyəti vədə qıləy mıştərəkə vəzifə iyən təəhud bə hisob omeydə və təkidış kardə ki ğeyri hərbiçion har vırədə ki bıbun bəpe əvoni oqətəmon.

Votey bəbe ki bə Fələstini səhiyyə vəzorətxonə bəyoniyəon əsos, Oktiyabrə manqi 7 minnə rujiku tosə ısət, 10 həzo 32 nəfər Fələstinıjon şəhid bıən ki ım miğdoriku 4104 nəfər hırdənin.

İjən 35 nəfər həm sionist rejimi dəvominə həmləon cərəyonədə zəxmin bıən ki çəvonku vey hırdənonin.

Fələstini səhiyyə vəzorətxonə 2350 nəfər qim bıə şəxson miğdori ğeydış kardə ki çəvonku təğribən 1300 nəfər hırdənonin.