Əmirəbdullahiyan: Ər-Riyad iclos, co kərə Fələstini məsələ pur ranqış kardə

İroni xarıci vəzir de işorə bə Ər-riyadədə ərəbi və İslomi kişvəron yolon iztiroriyə iclosi bərpo bey, təsdiğış kardə: ım iclos co kərə Fələstin və Ğudsi məsələ əhəmiyyət, inteqrasiya cəhəto bənə islom dınyoədə, qıləy vey muhimmə amil pur ranqış kardə.

Şənbə rujədə Ər-Riyadədə, Fələstin və Ğəzzədə ısətnə şəroyeti təğib kardeyro, mıştərəkə surəti ğolibədə, İslomi və Ərəbi kişvəron yolon iztiroriiyə iclos ərpo bıə.

Bə İrna raporti əsos, İroni xarıci vəzir Huseyn Əmirəbdullahiyan İnstaqeram sosiyal kanalədə nıvıştəşe: İron İslom Respublika bə beynəlxalğə həxon əsos, Fələstiniro daimə və vey muhimmə hələkə roy, de həmmə Fələstinıjon həmkoəti, referandom bərpo bıey zınəşe ki həmişə siyosi vey ali səthədə bəy təkid bıə.

Əmirəbdullahiyan ijən əlovəş kardə: ım iclosədə İron İslom Respublika de 10 qılə vey muhimm, əməliyoti və təcili təklif bə Fələstini mənafe əsos ğoymə ğərol qətey təkidış kardə, ım təklifon əcumlə "Ğəzzə milləti ğətli-ami oqətey, Ğəzzə insoni mıhosirə komil surət peqətey, ım məntəğəku sionist rejimi hərbi təcili xarıc bıey,de islomi kişvəron vositə de sionist rejimi harcurnə siyosi və iğtisodi rabitəon ğət kardey, sionist rejim və Amerkə yolon təğib və cəzo doeyro beynəlxalğə məhkəmə təşkil doey, de islomi kişvəron vədə Ğəzzə təcili tojədən obod kardeyro məxsusə fundi təsis kardey,islomi kişvəronku bə Fələstini millət humanitarə koməkon vığandey" şomil bıdə.

Votey bəbe bə Ğəzzə tanqə sionist rejimi ləşkəri həmləon nəticədə ki Oktiyabrə manqiku bino bıə be, və tosə ısət dəvomış heste, Fələstini şəhidon miğdor, bə 11 həzo 208 nəfər rəsə ki ım miğdoriku 4 həzo 506 nəfər hırdən, 3 həzo 27 nəfər və 678 nəfər həm piyə odəmonin.