Bə Ğərbi Asiyə hodisəon qıləy nəzə

Bə Ğərbi Asiyə hodisəon qıləy nəzə

De sehyonist rejimi bə Ğəzzə tanqə ələyh həmləon bə i zəmon LBC televiziyə kanal bə qıləy aqahə mənbə nəğli əsos xəbəş doə ki,israyili rejim bo bə Livani zəmini həmlə kardero hozzı beydə ta tiki həm çı kişfəri vəş qətə vəzyəti şuləvər bıko.çe sehyonist rejimi mediyaon hisobotışon doə ki,Qulani ləşkəri briqadə çandə həzo sərboz və əskər ki,Ğəzzəşon tərk kardə,bə şimoli marzon yəni bə Livani səmt  rəsən və çandə sa qılə tankon həm bə Livani sərhədi tərəf hərəkət kardəşone.sehyonist rejimi canqi vəzir Yuav Qalant həm seşambə ruji de qıləy sıxani iddioş kardə ki,Ğəzzədə bə əməl hodisəon mumkine livanədə həm təkror bıbu.

Bə Livani çe sehyonist rejimi doə çəşnavi əsliyə dəlil ıme ki,ın anti-bəşəri rejim təğribən bın dəvardə 4 manqi dırozi,çe şimoli səmtiku sanqinə zərbəonış hardə iyən çe Livani Hizbullah ğıvvon bə işğal bıə əraziyon ələyh ziyodə əməliyyotonışon əncom doə ki,çandə da nəfər kışt iyən zəxmin bıən və bə ın rejimi ixtisodi cəhəto ziyodə xəsorət iyən ziyonon daxil kardəşone.bın barədə sehyonist rejimi rujnomə bıə Yədiut-Ahaarnuti nıvıştəşe ki,Livani Hizbullah ğıvvon Əlcəlil məntəğə qırd vıronədə bə israyili ləşkəri mevğıyyəton iyən bə hırdə şəhron səmt sanqinə rəketonış ğandə.ə rəketon ki,bə ın qəzeti votey əsos bə zəmin eqıniyə zəmonədə zəmini piyo dıjdə qoləon bə əməl vardedə.binobərin sehyonist rejimi de bə Livani həmlə təhdidi nəyinki,bənə Ğəzzə ləpəki qıləy nəticəş bəbe,bəlkəm bo tel-avivi çımi sanqinə nəticəonış həm bəbe.zira Livani Hizbullah ğıvvon bo sehyonist rejimi qıləy psixi iyən rəvoni hənək bənav bardedə və bə ikərə ıştə malik bıə həmmə çiyonış nışon doəni.binobərin bə netanyahu kabineti xəbərdoərti doydən ta bə de Hizbullah ğıvvon canqi səmt hərəkət nıko....

Ğəzzə tanqə sahədə dəvardə haftədə muhimmə hodisəonku qıləyni həm,ə xəbəonin ki,bo otəşvəsi icod kardero ehtımoliyə sazışi xısusədə mıntəşir bıə.məlumoton çımiku hikoyət kardedə ki,israyil.amerkə,misr iyən ğətər parisədə bo canqi oqəteyro iyən Həmasi nəzdədə bıə bo israyili əsiron ozodəti çərçivədə saziş bastəşone.NBC nyuz iddioş kardə be ki,ın plan bo əsiron əvəz kardey iyən dı manqi ərzədə bə canqi oqətey maddəon şomil beydə.iqlə Ğətərıjə rəsmi şəxsi votəşe ki,komilə otəşvəsi bərpo kardey, israyili rejim hərbi ğıvvon komilə surətədə Ğəzzəku xaric bıey,avarə və sərqərdon bıə kəson məskun bıə vıron əmniyyəti təmin kardey,Ğəzzə sənibıəton təmir kardey iyən əsiron mıbodilə nuyə əməliyyot çın tojə plani maddəonkuon.

Ğəzzəku əsiron ozod kardey iyən Həmasi məhf kardey çı sehyonist rejimi Ğəzzədə təyin kardə canqi hədəfonku be.demiyən ın dıqlə hədəfon reyal kardey ısət de sıvi dimbədim omə.Nyu-York taymz rujnomə çand ruj çımi bənav məlumotış doəbe ki,sehyonist rejimi ləşkəri komandanon bə ın nəticə rəsən ki,har dıqlə hədəfon reyal kardey və bə əməl vardey iqlə zəmonədə ğeyri-mumkine.çımisə əlovə siyosi analitikonku veyni hətto işğal bıə Fələstınədə həm Həmasi komilə surətədə çe miyoniku bardey məsələşon bə sıvoli ji bardəşone.sehyonist rejimi ləşkəri sabiğ rəsmiyonku bıə qadi abzenkut ki,ısət holı-hozzıyədə çe benyamin netanyahu canqi kabineti uzvonku qıləyni bə hisob omeydə,de qıləy mısohibə bo Həmasi komilə surətədə çe miyoniku bardeyro çı israyili rəsmiyon və`dəonış hikoyə iyən nağlış tevsif kardə.çe sehyonist rejimi kanə sərvəzir bıə ehud olmert həm çandə ruj çımi bənav qıləy yoddaştədə Haarets qəzetədə nıvıştəş be ki,netanyahu ıştən həm zıneydə ki,ğadir ni ta Həmasi çe miyoniku bıbo.

De bə ın şərayiti dığğət kardə holədə və həmçinin işğal bıə əraziyonədə bə netanyahu kabineti təzyiğon rəğmən,bə ın nəticə rəsə ki,ijən de mızokirəon roy vositə çe əsiron ozodəti koy təğibko.bə həmonə dəlili xoto həm Həmasi hənuz bə ın plani qıləy cəvobış doəni.zira Həmas çe qıləy poydor iyən sabitə otəşvəsi dumoye,nəyinki,qıləy kuto mıddətinə otəşvəsi tələbko....