İron və dınyo co qılə məntəğəonədə Ğədrə şəvi mərosimi bərpo bey

Zinə Çoşəmbə Rəməzon mıborəkə manqi 19minnə ruj iyən Ğədrə şəvi iminnə şəvonku be və İroni həmmə millət məçiton və co qılə məzhəbi vırəonədə Ğədrə şəvi mərosimi bərpo kardışone.

İmomət və viloyəti aşığon mobarəkə rujə manqi 19-nə şəvədə ironi mıxtəlif vıronədə bıə məçiton, təkiyəon, Huseyniyəon, ımomzodəon iyən məzhəbiyə vıronədə cəm bin və detosə sıb Kərimə Ğıroni təlavət kardışone, Coşəne kəbir nomo bıə dıvoşon hande və ilahi əzəmətinə nomoni zomzomə kardeşone.

İroni mısılmonə millət xususi Məşhədədə bıə İmon Reza(ə) pokə hərəm, Ğomədə bıə Xanım Məsome(s) iyən Cəmkərani pokə məçitədə deştə əzəmətinə huzuri ujnən de İmom Əli(ə) və Xıdovənd xalıği əhdışon baste.

Əhle beyte ismət və təharət(ə)-i məddahon həmçınin zinə şəv Molaye muttəğiyan Həzrət Əli(ə)-i həxədə nohə iyən mərsiyəşon hande.

Rujə manqi 19 minə səhərədə Xəvaric qrupiku İbne Mulcəm Muradi qıle holədə ki İmom Əli(ə) Kufə məçitədə nımoj vote holədə be dıştə zəhrinə şımşi ə Həzrəti mıborəkə sə anədə de şiddəti zəxminış kardə ki oxoy sə şiəyon i minə İmom 2 ruj bəpeştə yəni rəməzanə manqi 21 kədə şəhid be.

Bə rəvayəton əsos mubarək rujə manqi 19, 21 və 23-nə şəvon həmonə Ğədrə şəvonku iborəte ki mısılmonon de şəvədə oğo mande, Ğıroni bə sə noe, dıvo hande, Coşən Kəbir nomo məxsusə dıvo ğiroət karde deştə Pərvərdıqori raz-niyaz və mınocat kardedən.

Ğədrə şəv qıləy şəve ki 1 sori mıddətdə çəy fəzilət bənə 1000 manqədə ibodət karde ğeyd bıə və həmonə şəvədə cəmaəti təğdir və tale mıəyyən bəbe.

De İmom Əli(ə)-i məxsusə inoyəti inşaəllah şımə zinə Ğədrə şəvi ibodəton ğəbul bıbun.