Suriyə Idlibədə Tırkiyə hərbiyə əməliyaton barədə Rəcəb Təyyeb Ərdoğani əcibə sıxanon.

Tırkiyə prezident votışe: Suriyə Idlibədə Tırkiyə hərbiyə əməliyaton barədə hiç kəs Tırkiyəku tənğid karde həxış ni.

Bə Anadoli aqentiyəti raporti əsos Rəcəb Təyyeb Ərdoğan Suriyə Idlibədə hərbiyə əməliyaton bino karde barədə bə Tırkiyə və Suriyə miyono veyə marzon işorəş kardə və votışe: Tırkiyə hərbiyə ğıvvon terrorizmi mığobilədə çı Suriyə millətiku himoyə dorti karde xoto Suriyədə hərbi zəmini əməliyati binoş kardə.

Jıqo əməliyaton qıləy şəroyetədə bino bıə ki Tırkiyə çımiku bənav və bə fakton əsos hejo Suriyədə çı terroriston peştədə be.

Tırkiyəku xəbə omə ki çı Tırkiyə hərbiyə ğıvvon mərkəziyə ğərorqo həm elanış kardə ki Suriyə Edlibədə hərbi bazaon bino bəkay ta ım ostanədə bo otəş basti nəzorət karde xoto zəminəon hozzo bıbu.

Tırkiyə hərbiyə ğıvvon ım hərəkət və huzur qıləy şərayetədə əncom bedə ki Tırkiyə i minə vəzir tojədən Suriyədə Tırkiyə hərbion huzuri çı sərhəddon kontrol əkə ijən bə avarəon daxil bey icozə nıdoe ğeyd bıə be.

Əmmo çımiku bə nav çı Tırkiyə mudafiə vəzir, Suriyədə Tırkiyə hərbiyə əməliyaton illəti məntəğə təhdidon məhv karde ğeydış kardə be.

Tırkiyə həmmə hərbiyə ğıvvon mərkəziyə ğərorqo həm iddiyaş kardə ki ım əməliyat çı Astanə şəhrədə bıə İron, tırkiyə və Rusiyə miyono 3 tərəfiyə muzakirəon çərçivədə əncom bıə əmmo bə fakton əsos Suriyə Edlibədə otəş basti qarantiya kardero ğəror be Tırkiyə çı Suriyə dıvləti ğıvvon iyən muxalifon miyono otəş basti kontrol bıkə.