Kabulədə ijən DAEŞ-i terroristiyə əməliyaton.

Əfğanestani Kabulədə DAEŞ ijən terroristiyə əməliyaton məsuliyəti ğəbulış kardə.

Bə Frans Peres raporti əsos DAEŞ rəsmən ıştə ozvon tərəfo Əfğanestani Kabol şəhri Tebyan nomo mədəniyə mərkəz və Əfğan sədo aqentiyəti vırəonədə terroristiyə əməliyaton əncom doe elanış kardə.

Bə əmniyyətiyə rəsmi şəxson voteyon əsos detos bə ısət ım terroristiyə əməliyatdə 41 nəfər kıştə iyən 84 nəfər zəxmin bıən.

Əfğanestani kişvər vəzarətxanə sıxənəvot Nəcib Daneş ım əməliyati de səvet hukuməti bə Əfğanestan hucum karde sorqardeşi məxsusə bərnoməon dəvoniyə həmzəman elanış kardə.

Çı Əfğanestani Tebyan mədəni və iştimaiyə mərkəzi rəis Seyed Muhəmməd Haşımi jıqonə terroristiyə əməliyatonış ım muhimmə mərkəzi fəaliyəton dırıstətiku nışonə zınəş be ijən votışe: DAEŞ-i tərəfo jıqonə həmləonku hədəf Əfğanestani milləti miyono tars və məzhəbi daveon icod karde heste və hol ım ki əmə ıştə mədəni və ruşin əkə fəaliyəton dəvom doero çımiku vey cəhd bıkamon.

Çı Əfğan sədo nomo bıə aqentiyəti rəis Seyed Həsən Husseini həm DAEŞ-i bə ım mərkəz huccum karde ım aqentiyəti həğiğət nəşr əkə siyasəton məhv karde cəhətdə zınəş be ijən votışe: deşmən jıqo bə cıvonon həğiğəti nışo doe cərəyanon tov varde əzeni.

Zinə ım terroristiyə əməliyati bəpeştə islamiyə tele rədio i bemon, İroni xarıci vəzarətxanə sıxənəvot, Tırkiyə xarıci vəzir iyən çı Əfğanestani vey ali rəsmi şəxson həminə cinoyəti məhkum və de mardə kəson ailəon iyən Əfğanestani dıvlət və millət ıştə həmdardi elan kardən.