Burucerdi: İroni barədə Trampi puçə xəyolış be.
İroni islamiyə şura məclisədə əmniyyət kamissiya sədr Əlaeddin Burucerdi votışe: İronədə təfrəğə və noəmnion icod kardero Amerkə prezidenti səy və cəhd be foydə be boçi ki İroni millət hiç faxt bə hiç kəs çı daxıliyə koonədə mıdoxilə karde icozə nibədon.
Əlaeddin Burucerdi bə İrna aqentiyəti votışe: Amerkə və siyonist rejim cəhd kardən ta bənə Yəmən, Suriyə, İrağ və Pakistani noəmnə vəziyəti bə İron daxil bıkon.
İroni islamiyə şura məclesədə əmniyyət kamissiya sədr de İroni etıroz aksiyaon əsliyə illəti bəzi iğtisodiyə problemon elan karde təkidış kardə ki İroni milləti deşmənon cəhd kardə bən ta etırazon bə iğtişoş və noəmnə vəziyəti tərəf bıbən.
Əlaeddin Burucerdi ijən votışe: Amerkə və siyonist rejimi siyasət islam dınyo və İronədə noəmnə vəziyəti icod karde heste.
Ğeyd kəmon ki İronədə etıroz aksiyaonku sue-istifodə kardero Amerkə prezident Tramp çand kərə iğtişoşçion təhrik karde bəpeştə çəvonku himoyədorətiş kardə.
Dəvarde haftə 5 şambə rujiku İroni bəzi şəhronədə cəmaət de aksiyaon bəzi puliyə muəssisəon vəziyəti mıəyyən nıbey, ərzağon boho bey ijən dıvləti nəzorəti zəifəti xoto etırozon bino kardən ki bəzi fitnəkoron sue-istifodə karde zəminəon bois be.
Amerkə və siyonist rejimi rəsmi şəxson ijən xarıciyə mediyaon ım vəziyətiku istifodə karde sayədə iğtisodi etıroz aksiyaon bə siyasi iğtişoşon tərəf bardən.
Çımiku bə nav, 2009 sorədə həm İronədə prezidenti səçıni nooromtətion bəpeştə Amerkə, İnqeltra və vabəstə bıə onsoron ıştə həmmə imkanaton vasitə bə İroni islamiyə nizomi zərbə varid karde fikədə bıən ki İroni millət çəvon fitnəon xonsa kardən.
