AİŞ və çey muttəfiğon bə Suriya həmlə cinayətə hərəkəte
Amerika İbə Ştaton bə Suriya paytaxt Dəməşği raketə həmlə çe dınyo ictimaiyyəti nəzəri cəlb kardə ən yolə hadisəy. "Nur-az.com" bə "Təsnim" xəbər aqentiyyəti istinadən nıvıştedə ki, İslamiə inğilabi yolə rəhbər Ayətullah Seyid Əli Xamenei votəşe ki, ım hucum cinayətə hərəkəte.
Amerika və Fransa prezidenton, İngiltərə sər nazir cinayətkarin. Çe ım cinayətiku foydə peqəte nibəznen. Çoko ki, dəvardə soronədə İraq, Suriya və Əfqanıstanədə jıqo cinayəton kardışone və hiç qıley foydə bə dast varde nıznışone.
Rusiya Prezident Vladimir Putin bə ım həmlə bənə təcavuzi ğıymət doşe, votışe ki, ım hərəkət bə İMT Nizamnamə tələbon və beynəlxalqə huğuğə normon zidde, bə terrorizmi əleyh mubarizə bardə suverenə devləti munasibətədə təcavuzə əməle.
İMT Əmniyyətə Şura uzv Çin devləti Xarici Koon Vəzarətiən ım hucum məhkum , Suriya problem de muzakiron roy həll bıe təkid kardəşe.
Suriya Ərteşi Ğıvvon Sər Komandanəti məlumat doəşe ki, AİŞ deştə muttəfiğon bə Şam və ətrof məntəğon 110 qılə raket ğandəşone. Suriya Həvo Hucumiku Mudafiə ğıvvon cəvon 70 qılə məhv kardəşone. Rusiya Mudafiə Vəzarəti ım fakt təsdiğ kardəşe, əlavən votəşe ki, Suriya tərəfi çe SSRİ vaxti istehsal bıə S-125, S-200, "Buk" və "Kvadrat" raketonku istifadə kardəşe. Bı koədə tojə S-400 raketon bə ko dənoə bıə nin.
Turkiyə hokumət isə çe ım hucumi tərəfədə mande, çey XKV ıştə məmnuniyyət elan kardışe. Amerika ım hucumədə çe Turkiyə əraziədə ıştə "İncirlik" hərbi bazaku istifadə karde xəbə Turkiyə sər naziri muavin Bəkir Bozdaği təkzib kardəşe. Ey ıştə "tvitter" səhifədə nıvıştəşe ki, "ım hucumiku bə nav AİŞ və Turkiyə Hərbiə Qərarqahi rəison de çəmə prezidenti didorşon dəvunie. Əmo bı hucumədə "İncirlik" bazaku istifadə kardə bıə ni".
Amerika tərəfi çe "İncirlik" bazaku istifadə xəbə du bıboən, Turkiyə rəsmiyon bə ım təcavuzə hərəkəti tərəfdar beşe, bə İron Rusiya və Turkiyə hokuməton Astana, Soci, Ankara setərəfinə sammit və didoron elan kardə məram və məğsədon zidd qıley hərəkəte.
