Amerkə təhdidon vədə Tırkiyə rəsmi şəxson reaksiya.

Amerkə prezidenti tojə təhdidon bəpeştə, Tırkiyə prezidenti sıxənəvot votışe: Tırkiyə hiç vaxt təhdid zıvoni ğəbul nibəkay.

Bə TRT yelevəziya raporti əsos, Ebrahim Kalin qıləy bəyoniyədə votışe: Tırkiyə təhdid karde sayədə hiç nəticəi aid ni bəbe və Amerkə dıvlət bəpe ıştə rəftorədə ijən diyə bıkə.

Çımiku bə nav Tırkiyə xarıci vəzir Mıvlud Çavoş Oğlo həm Vaşenqtoni təhdidon reaksiyadə votışe: Ankara jıqonə təhdidon tovoni bə varde boçi ki ğanun həmmə kəsonro bərobəre və farğ dodə ni.

Tojədən Trump bə Tırkiyə xəbə dortiş doe ki ım kişvər bəpe rə Amerkəvıjə kişiş Əndro Beronsoni ozod bıkə və illa Amerkə bə Tırkiyə zid şiddətinə sanksiyaon təsdiğ bəkarde.

Amerkə prezidenti muavin həm zinə Tırkiyə dıvlət və prezidenti təhdidış karde ki ım kişişi ozod nı karde bəpeştə bəpe çı nəticəon intizorədə be mandon.

Tırkiyə dıvlət 2 sor çımiku bə nav Andro Bronson ki de Fəthullah Qolen təşkilati həmkari karde ittiham dəstqir kardəş, əv həm də həminə ittiham ki əv de Qolen təşkilati terroristiyə həmkari və hərbi peqardımonədə əloğəonış be.