İroni mudafiə vəzir de Suriyə prezidenti vindemonış kardə.

İron İslam Respublika mudafiə vəzir de Suriyə prezidenti videmonədə terroriston vədə mığovimət ğıvvon və Suriyə ərtışi ğələbəon təbrik votışe və izhorış kardə: nə fəğət məntəğə cəmaəton bəlkəm dınyo milləton həm Suriyədə bə terroriston məhv karde mubarizəon ğərzxoin.

İroni mudafiə vəzir qeneral mayor Əmir Hatəmi zinə de Suriyə prezident Bəşar Əsəd videmoni cərəyonədə umuş be de Suriyə sərzəmini co mandə baxşon terroriston işğaliku ozod karde, məntəğə çı Təkfiriyə terroriston şəriku xılos peydo bıkə və Suri avarəon bə ıştə kəy oqardon.

Qeneral mayor Hatəmi votışe: İron bənə bıhran və de terroriston mubarizə barde dıvrə ki Suriyə millət və dıvləti kənoədə be, ijən bo ım kişvəri obod karde xoto Suriyə millət və dıvləti kənoədə mande xoto hozzıe.

Əv əlovəş karde: İroni ğəyri dıvlətiyə şirkəton de çokə zərfiyəton və ğabeliyəton karde bəznın Suriyə obod karde dıvrədə həmkari bıkən.

Suriyə prezident həm İron İslam Respublika mudafiə vəziri və çı heyəti səfəri ki de Suriyə ərtış və mıttəhidon ğələbəon həmzəmon be, çokə şəfər zınəş be və votışe: Dəməşğ-Tehroni rabitəon ğoym və stabile və həmmə şaiyon ki 2 qılə kişvəri əloğəon barədə hestin İslami İnğilab səbarz bey vaxtiku İron və Suriyə miyono bino bıə rabitəondə hiç təsirış ni.

Qeneral mayor Əmir Hatəmi zinə bə Dəməşğ varid bey bəpeştə, de Suriyə mudafiə vəzir Əli Əbdullah Əyubi həm videmon iyən İron və Suriyə miyono həmkarion, 2tərəfiyə rabitəon və de terrorizm mubarizə barde sahəonədə sohbət və muzakirəş kardə.