Dustiyə muğaviləku Amerkə xaric bey, Haağə hıkmədə təsirış ni.

İroni xarıci vəziri beynəl xalğ və huğuği muavin Haağə məhkəmədə bə Amerkə ələyh mıvəğğətə hıkmi sadir bey bo İroni millət qıləy səbarzəti zınəş be və votışe: İron və Amerkə miyono dustiyəti nomo bıə muğaviləku Amerkə xaric bey, ım hıkmi icra karde vədə mane ni.

Bə İrna raporti əsos Ğolam Husseyn Dehğani əlovəş karde: bə həminə hıkmi əsos Hağğə beynəl xalğ məhkəmə, Amerkə dıvlətiku tələbış karde ki dəvo damon, təbib təchizaton, xorək, ditəsərrufat iyən Avyasiya sahədə məhsolon və imkanaton bə İron varid bey vədə maneon peqəti.

İroni xarıci vəziri beynəl xalğ və huğoği muavin əlovəş karde: ım məhkəmə de əksəriyət sədo təkidış karde ki bo mali və poli mubadiləon bəpe icozə sadir bıbu iyən Amerkə tərəfo məhdodiyəton bəpe icod nıbu iyən şərayeti çımiku bevəcə bey vəy qətə lozime.

Dehğani həmçınin votışe: Amerkə hiç vaxt bəştə əleyh jıqo hıkmi sadir bey çəş kardə nıbe əmmo muhimmə noktə ıme ki ım mıvəğğətə hıkm bəpe həmmə tərəfon fəaliyətonədə icra bıbu.

İnqiltərə ədə İroni səfir Həmid Bəidinejad həm tojədən elanış karde: Amerkə istikboriyə rəftor iyən xosiyət, Hağğədə İroni huğuğiyə səbarzətiş tov nıvarde və əvon çı əvəzi dustiyə muğaviləku xaric bıən əmmo çı Amerkə ım hərəkət həm hıkmi icra vəy qətə bois ni bəbe.

Ətomiyə sazışiku Amerkə xaric bey bəpeştə İron Haağə beynəl xalğiyə məhkəmədə Amerkəku şikayətış karde ki nəhayətdə ım məhkəmə zinə qıləy mıvəğğət hıkmi vositə Amerkəş məhkum və ım kişvəri bə ğeyri ğanuniyə sanksiyaon ləğv karde məcborış ka.