Tırkiyə Amerkə sanksiyaonku ozod be.

Tırkiyə təbiiyə mənbəon və enerji vəzir votışe, çı kişvər i qılə 8 kişvərikue ki İroni nati əleyh bıə Amerkə sanksiyaonku ozod bıə.

Bə Fars aqentiyəti Tırkiyə "Dily Səbah" rujnomə nəğliku Fateh Donməz ki çimiku bənav İroni əleyh Amerkə nati sanksiyaon barədə ıştə kişvəri ozod karde xəbəş doə be, zinə votışe: Vaşenqton Tırkiyəş ım sanksiyaonku ozod kardəşe.

Fateh Donməz çimiku bənav Tırkiyə parlamentədə qıləy mıxbıri soali cəvobədə İroni əleyh Amerkə sanksiyaonku ım kişvəri ozod karde barədə izhor kardəş be: ım mıvzo barədə hələ hiç məlumot bə Ankara dast rəsə ni.

Im qıle holədəy ki Amerkə xarıci vəzir Mayk Pompeo zinə votəş be: Vaşenqton 8 qılə kişvəri çı İroni nati tojə sanksiyaonku istisno bəkay.

Çımiku bənav həm Belomborq aqentiyəti elanış kardə: Amerkə  bə 8 qılə kişvər əcumlə Çin, Yaponiya, Hındostan və Cənubiyə Koreya icozə bədoy ki 2018-nə sori Novambri 4ədə bə Tehroni əleyh 2 minə dıvrə sanksiyaon icra bino bey bəpeştə bə İroniku nat hırye dəvom bıdən.

De Donməzi təfsiron, Yaponiya, Cənubiyə Koreya, hındostan, Tırkiyə və Çin 5 qılə kişvəronin ki ım sanksiyaonku mıstəsno bıən.

Belomberq bə co 4 qılə kişvəron nomi işorəş kardə ni və çəvon nom peşo mıəyyən bəbe.

Im qıləy holədə bıə Amerkə prezident Donald Tramp zinə elan kardəş be, bə İroni əleyh sanksiyaoni ki bə ətomiyə sazışi illət peqəte bıən, oqordıniye bəbe.

Amerkə 2018-nə sori Mayə manqi 8 de ətomiyə sazışiku xarıc bey, co kərə de bə İroni zidd ıştə sanksiyaon oko doe təhdidış kardə, həmonə kişvəron ki bə İroniku nati hırye idomə bıdən, təhrim bəkardəş

Amerkə detosə Novambri 4 bə İroni nati mıştəriyon mıhlətış do ki ıştə nati hırye İroniku bə sıf bırosnon.

Əmmo nati beynəl xalğiyə vıjoron ım həğiğəti nışo dodə ki, nati istehsoləkə 3 minə kişvər iyən nati sadirəkə kişvəron təşkilati(Opek) qıləy muhimmə uzv, İroni kamilən vıjoriku məhv karde ımkinış ni.