Cəmal Xaşeğci ğətli barədə Trampi bəyoniyə vey be abru əkə be.

İroni xarıci vəzir Muhəmməd Cəvad Zərif Donald Trampi bəyoniyə barədə ıştə Twitter səhifədə nıvıştışe: Tramp qıləy əcibə hərəkətədə ıştə bəyoniyə i minə hissədə ki bəpe Səudiyə rejimi cinoyəton bardə bıbu İronış bə muxtəlifə be əsosə məsələon mıttəhəm kardə; ğasbo İron Kaliforniya eştatədə hevujə otəşi cərəyonədə həm rolış be?

Donald Tramp zinə qıləy bəyoniyədə əv həm muxtəlifə jurnalist Cəmal Xaşeğci ğətli barədə Səudiyə Ərəbistoni cinoyətkorə rejimi siyasəton əvəzi İronış bə məntəğədə be stabil vəzyəti icod karde mıttəhəm kardışe.

Tramp ım bəyoniyədə ijən Ərəbistoni vəliəhd Muhəmməd Bin Səlmaniku himoyədortiş karde.

Tojədən Tırkiyə xarıci vəzir Molod Çavoş Oğlo həm Cəmal Xaşeğci ğətli dosiyə barədə çı Ərəbistoni həmkari nıkardeku tənğid kardışe və votışe: əqə ım vəzyət dəvom peydo bıkə Ankara İ Bıə Milləton Təşkilati koməkonku istifodə bəkarde.

Çavoş Oğlo təkidış karde ki bəpe ım ğətli əmri sadirəkə məlom və oşko bıbu.

Ale-Səud rejim Oktiyabri 20 de pısoxtə bıə dastani, Tırkiyə Stanbulədə bıə Ərəbistoni konsuləti vırədə Xaşeğci ğətli məsuliyəti ğəbul və iddio kardeşe Xaşeğci de İstanbulədə Ərəbistoni konsuləti kadron dave vositə kıştə bəy.

Çəy bəpeştə həm elan be ki ım jurnalisti cənazə tikə tikə bey bəpeşt ov kardə bəy!

Amerka ısət Ərəbıston xususi Bin Səlmani ım macəraku xilos karde fikədəy.