Dınyo məmləkətonədə bo Rujəmo çı cur hozo bedən.

De miladi təğvimi mayə manqi 6-minə ruji muğəddəsə Rəməzonə manq bino bedə. Dınyo muxtəlifə məmləkətonədə mısılmonon bo Rujəmo hozoəti tədbiron icra kardedən.

“Maide.az” sayt xəbə dodə ki, Avropa məmləkətonədə jimon kardə mısılmonon de Rujəmoə manqi əlağədar plakaton bə şəhəri ictimai nəğliyyaton səpe dəcokniəşone. İron və Turkiyə keşvəronədən de Rəməzonə manqi əlağədar məxsusiə tədbir və proqramon bə jimon dəvunidən. Məçiton, ziyarətqahon və diqər ibadətə vırəon dəparçınidən, bə odəmon barzə səviyyədə xidmət nişon doe ro hozo bedən.

Dəvardə rujonədə Uzbəkistoni  prezident Şəfğət Mirzəyiyevi de Rəməzonə manqi əlağədar qıley sərəncom doəşe ki, devlətə idarəon ım muğəddəsə manqədə bə kamtəminatinə xeyzonon maddiə koməkon nişon bıdon.

İbə Ərəbiə Əmiration hokumətiən rəsmən Rəməzonə manqədə koə vaxti muddət kutoh kardəşe ki, insonon qamə həvoədə əziyyət nıkəşon.

Rəməzonə manqi kom məmləkətonədə har ruj rujə qəte muddəti çand saat bıeyən muəyyən karde əhəmiyyətinə məsəlonədə qıleye. Məlume ki, Azərbaycanə Respublikadə rujə qəte muddət har ruj 17 saate. Əmo Kobəsonə məmləkətonədə ki, həşi rə pemedə - di nıştedə ım muddət çand saat dıroz dəkəşedə. Məsələn, Skandnaviya keşvəronədə 1 rujnə rujə qəte muddət bə 21 saati neze. Almaniya, Belçika, Niderlandədə rujə qətə vaxt har ruj 18 saatisə ziyod bəbe. Im muddət Rusiya, Danimarka, Yolə Britaniyadə 18-19 saat, Ukrayna, Fransa, Macarıston, Rumıniyadə 17- 17 saat nim, Bolqarıston, Bosniya və Hersoqovina, İtaliya, İspaniyadə 16 nim- 17 saat bəbe.

 Jıqo ən kutohə muddət isə Arqentinadə bə 9 saat 20 dəğiğə bərobəre. Braziliya, Niqeriya, İndoneziya, Həbəşiston məmləkətonədən ruji dırozi təğribən ım ğədər bəbe.