Terroriston maliyə mənbəon bəpe məhv bıbun.

İroni xarıci vəzarətxonə de terrorizm iyən radikalizm mubarizəkə idarə rəis votışe: bə kişvəron maliyə ğanuni əsos iyən terroriston maliyə mənbəon məhv karde xoto bəpe məntəğə və beynəl xalğ əloğəon həmmə tərəfin hevuj bıbu.

Bə Fars aqentiyəti raporti əsos Tacikistonədə bıə terroriston maliyə mənbəon mubarizə barədə nomo iclosədə Husein Məleki təkidış karde: de narkotik maddon mubarizə barədə fəaliyətonədə Amerkə sanksiyaon vey mənfi təsirış be və ım məsələ Vaşenqton rəsmən bəpe məsoliyəti ğəbol bıkə.

İroni xarıci vəzarətxonə de terrorizm iyən radikalizm mubarizəkə idarə rəis ijən votışe: de terrorizm mubarizə barədə i minə mərhələdə bəpe bə çəy əsliyə rişəon xusosi xarıci kişvəron təcavuz, Fələstin sərzəmini işğal və radikalizmi rəvocədə əğidəon diğğət bıbu.

Məleki ijən bə yodış varde ki de terrorizm mubarizə barədə və çəy maliyə mənbəon məhv karde xoto bəpe bə beynəl xalğ ğanunon diğğət bıbu.

Əv bə de narkotik maddon mubarizə barədə sahədə İroni çandə həzo nəfər şəhid və veteranon təğdim karde işorəş ka və votışe: İron dəvardə 10 sori mıddətədə 11 həzo ton muxtəlifə narkotik maddon kəşfış karde ki bə İ Bıə Milləton Təçkilati statsikaon əsos 75 faiz çı dınyo tiyok və 30 faiz heroiniku iborət bıdə.