Çoknə zəmini orbitiku qıləy İronıjə çəş, ayəndə mışohidə kardedə?

“Xəyyom” və “Paya” nomo peykon bo zəmini dəğiğə pamyeyro əcumlə İroni bumi kosmik muvəffəğiyətonku bə hisob omeydə.

Xəyyom nomo peyk ki Milodi 2022 minnə sori Avqustə mənqədə bə orbit vığandə bıə, de 1 metri nezi de şəffofə çand spektrə şikilon ğeyd kardedə.Im məlumaton, ditəsərrufat, mənbəon idorə kardey, geodeziya və şəhərsoxtey baxşonədə vey hevujə istifodəonışon heste.

Im texnoloqiya peştədə, İronıjə təhğiğəkəyon, ali məktəbi ustadon, muhəndison zıney və təxəssus cıhdışon heste.

Həminə mutəxəssison kosmik sistemon, şikilon təkmil kardey əlqoritmon və suni intellekt texnoloqiya inkişof doey holədən.

Paya nomo peyk ki komil surətədə çəy soxtey və dizayn bumie, diyəroku mığoyisə kardey texnoloqiya hevujətiro, İroni roy dəvom doydə.

Im şərhon kənoədə, “Raz” nomo system həm ğərore ki kosmik məlumaton bo təşkiloton və təhğiğəkəyonro bənə qıləy təcrubəinə əbzor təbdil bıko.

Eksperton jıği bovəşon heste ki peyki məlumaton və suni intellekton de yande umuj qıniyey, zəminon idorə kardey ayəndə təhəvvul bəkarde.

Həminə texnoloqiyaon, ditəsərrufati baxşiku qəte tosə ətrof muhit, İroni kosmik sənaye navəşəti zumandətion nışonəy.

İron ısət 20 soriku veye ki de elmi və dəvomin surəti, kosmik texnoloqiya inkişofi dumoədəy və muvəffəğ bıə muxtəlifə peykon bə orbit bıvığando.