Çe Rusiya devləti bə İron- Amerika behrani munasibət

Omani dıyoədə bə natkırniə tankeron təşkil bıə təxribatiə həmlədə, çoko ki çəş kardə bedəbe, Amerika rəsmiyon dərhal İroni tərəf qınokar zıneşone.

Çəvon devlətə katib Mayk Pompeo oj-oşko votşıe ki, ım həmlə İroni tərəfo təşkil bıə. İm fikir Rusiya “Çarqrad TV” ıştə saytədə nıvıştəşe. Çey muəllif bə İİR XK vəzir Məhəmməd Cəfər Zərif`i votə  “B qrup bə B plani icra ovaştə, yəni bə İroni əleyh iğtisadi terrori eparçınie və reqionədə əmniyyəti muhafizə karde ro co məmləkəton, Yaroniyan həmçinin, bardə diplomətikə cəhdon sabotaj karde plan bə ko dənoəşe” fikri tərəfdar beşedə, təklif kardedə ki, ım “B” qrupi İroni təcrid kardə cəhdon vəy se ro çok əbi ki, Rusiya de İroni nuvə proqrami muğavilə  tərəfdarə keşvəron – Fransa, Çin, Yolə Britaniya, Almaniya, həmən Yaponiya, Cənubiə Koreya iştiraki beynəlxalğə konfrans təşkil karde təşəbbusi bə nav bədey. Im tədbiri çe AİŞ İroni bə hərbiə munağişə cəlb kardə plani bə puç bekarde roədə yolə əhəmiyyətış əbi.

Kazan Avroasiya tədğiğaton mərkəzi direktori muavin İsmaqil Qibadulin`i bə “Çarqrad”i doə musahibədə votəşe ki, de səd dər səd bovə vote bəbe ki, İroni həmonə həmlonədə hiç qıley rolış ni. Im əməlon bə İroni əleyh informasiya muharibə tərkib hissəy ki, ey reqionədə bə təcridə vəziyyət eğandeşon pidə.

Kremli mətbuatə katib Dmitri Peskoviən ım vəziyyət jıqo şərh kardəşe ki, İraği işğalədə Amerika devlətə katibi İMT Sər Assambleyadə numayiş kardə sipiə xokə hələ çəmə yodo beşə ni. Bı məsələdən İroni qınokar zıne ro tadibəsə bıe lozim ni.

Prezident Vladimir Putin Bişkekədə Şanxay Həmkarəti Təşkilati sammitədə Amerikaş reqionədə siyasiə vəziyyəti şiddətin kardeədə qınokar zıne, bə çey de İroni atomiə proqrami muğaviləku itərəfinə ğaydədə beşe işarə jeşe.

Beynəlxalğə Atomiə Enerji Aqentiyyətiən ğeyd kardəşe ki, İron bə nuvə proqrami əlağədar dəbastə muğavilə şərton hələən əməl kardedə.