De İroni mənafe təmin karde vasitə stabilə əmniyyəti icod karde bəbe.

Rusiyə prezidentəti məxsusə nımoyəndə de İroni əmniyyət aliyə şura sərkatib vindemon karde votışe: məntəğədə zumandə təsirinə əmniyyəti icod karde xoto bəpe bə İroni rol və mənafe diğğət bıbu.

Bə İrna raporti əsos Əleksander Lavrentiyev de Əli Şəmxani vindemon karde cərəyonədə bə Rusiyə, Amerkə və sionist rejimi miyono 3 tərəfiyə iclosiku mediyaon bənə anti İron hərəkət sue istifodə karde cəhdon işorəş karde və votışe: ım iclosədə Suriyədə İroni ğanuniyə huzuri barədə Rusiyə oşko nəzər və vindemon elan bıə iyən əmə təsdiğ kardımon ki anti İron fişaron hiç foydəş ni.

Rusiyə prezidentəti məxsusə nımoyəndə bə ətomiyə sazışiku Amerkə ğeyri ğanuni xaric bey işorəş karde və votışe: ım ki co kişvəron ğeyri ğanuniyə rəftoron və bə ehdemonon əməl nıkarde sorəti İroniku komil bə ətomiyə sazışi əməl karde intizorədə bebəmon imkonış ni.

İroni milli əmniyyət aliyə şura sərkatib həm bə İron və Rusiyə miyono əloğəon işorəş karde və votışe: ətomiyə sazış, bə İron Amerkə cəsusə təyyarə təcavuz karde, İnqiltərə vey hərbion İroni nat kernə tankeri dızdiyə və Suriyədə İroni ğanuni huzuri barədə Rusiyə nəzər vindemon bə təsdiğ loyiğe.

Əli Şəmxani məntəğədə Amerkə bıhran icodəkə hərəkətonış çımiku vey silah həvatə çərçivədə zınəş be və votışe: məntəğədə be stabilə vəzyəti kam karde xoto siyasi fəaliyəton kənoədə İron ıştə mənafe və əmniyyətiku de zumandəti mudafiə bəkay.

Xəbə ome bə İron çı Rusiyə prezidentəti vığande heyət ımruj de İroni xarıci vəziri siyasi məxsusə dəstor iyən Suriyə koonədə ali muzakirəkə Əli Əsğər Xaci vindemonış karde.