Əfğanıstaniku oxonə xəbəon.

Pakistani xarıci vəzir Amerkə iyən Taleban qrupi miyoni sulh muzakirəon bəpeştə qıləy muğavilə imzo beyku xəbəş do.

Bə Ruyterz aqentiyəti raporti əsos Şah Məhmud Ğoreyşi ım xəbə elan karde bəpeştə təsdiğış karde ki Taleban pidəşe bəştə ehdəmonon əməl bıkə.

Əfğanıstani sulh muzakirəonədə Pakistani mıdoxilə qıləy şərayetədəy ki Əfğanıstani rəsmi şəxson vey kərə Pakistanədə Taleban və Amerkə heyəton miyono vindemonon tənğidış kardə be.

Əfğanıstaniku xəbə ome ımkişvəri əmniyyətiyə ğıvvon anti Taleban əməliyatonədə Hərat viloyəti 8 qılə dion 10 sor işğali bəpeştə Taleban qrupi dastiku ozod be.

Təxar viloyətədə həm Əfğaniyə ərtış hərbion əməliyotədə 13 nəfər çı Talebani uzvon kəşte bıən.

Əfğanıstani Helmənd viloyətiku həm xəbə ome ki ım kişvəri məxsusə hərbion əməliyotədə 13 nəfər əsir, Talebani zindononku xilos bıən.

Əmmo Taleban həm bə Ğundoz viloyəti polis mərkəzon həmlə karde əməliyotədə 10 nəfər əmniyyətiyə ğıvvon kıştəşe.

Meydan Vərdəkədə həm Talebani uzvon 3 nəfər ğeyri hərbi kıştəşone.

Əfğanıstani bevəcə şərayetiku tojədən xəbə ome dəvardə 4 sor canq və no oromə vəziyəti nəticə ədə 12 həzo hırdən Əfğanıstanədə kıştə və zəxmin bıən; ım xəbə İ Bıə Milləton Təşkilat təsdiğış karde.