Məntəğədə bıhranon bəpe de məntəğə kişvəron miyono bıə muzakirəon həl bıbu.

İroni prezident Tehronədə de Pakistani i minə vəzir vindemon karde bə terroriston, sionist rejim və Amerkə bəzi məntəğə kişvəron xatircəm bey bo məntəğə və islam dınyo be foydə zınəş be və votışe: məntəğə problemon bəpe xarıcionku dəvət karde əvəzi məntəğə nik niyəti sayədə bıə həmkari vasitə həl bıbu.

Həsən Ruhani votışe: ım sahədə i inə ğədəm Yəmənədə otəş bast və bə Yəmən həmləon vəy qəteye ki İron ım sahə ədə har curnə hərəkətonku himoyə əkəy.

İroni prezident bə Amerkə anti İron sanksiyaon həm işorəş karde və jıqonə hərəkəton bənə iğtisodi terrorizm bə hisob vardışe.

Pakistani i minə vəzir Umran Xan həm bə Pakistaniku İroni himoyəon işorə və təkidış karde: Pakistan həmmə sahəonədə de İron əloğəon bə inkişof rosniyəş pidə.

Əv bə məntəğə ədə bıə ixtilafon işorəş karde və votışe: məntəğə ədə bıə bıhranon çı məntəğə kişvəron mənafe çərçivədə ni və Pakistan pidəşe İron və Ərəbistoni miyono bıhrani həl karde xoto ıştə roli ifo bıkə.

Umran Xan həm yəməni canqi bə oxo rosniye bənə məntəğə sulh və əmniyyəti təminəkə moğəddəmə zınəş be.

Əv Keşmir mısılmononku İroni milləti himoyəonış bə təğdiri loyiğ zınəş be.

Im vindemonədə İroni prezident ijən de Amerkə muzakirə karde şərti Vaşenqtoni ijən bə ətomiyə muğavilə oqarde və anti İron sanqsiyaon ləğv karde bəyonış ka.