İraği Həşduş-Şəbi sulhinə etırazəkəyonku himoyədorətiş karde.

İraği Həşduş-Şəbi elanış karde ki ım kişvəri siyasi vəziyətədə mıdoxiləkə ni əmmo sulhinə etırazəkəyonku himoyədorəti bəkay.

Im muğavimətiyə qrupi bəyaniyədə təkid bıə ki Həşd-Əl-Şəbi bənə əmniyyəti hifzəkə ğıvvə İraği i bemoni peştədəy və terrorizmi vədə kişvəriku mudafiə bəkarde.

Tojədən İraği sosiyal şəbəkəonədə bə İraği Həşd-Əl-Şəbi təşkilat iyən ğıvvon əleyh pesoxtə bıə iddeaon polo bıə ki ım qrup əvoni rədış karde.

İraği yolə mərcə təğlid Ayətullah Sistani Oğeysi sərkatib həm qıləy bəyaniyə vasitə elanış karde ki sulhinə aksiyaonədə İraği milləti iştirok çəvon həxe; ım bəyaniyədə bə etırazəkəyon islohəkə tələbonku himoyədorəti təkid bıə əmmo cəmaətiku tələb bıə ki məciəti şikiliku sue-istifodə nıbu.

İraği prezident Bərhəm Saleh bə İraği milləti islohəkə hərəkəton həx təkidış karde və votışe: İrağədə bıhranon fəğət ğanuni çərçivədə həl bə nine.

Xəbə ome Bəğdadi hərbi əməliyot fərmondehi İrağədə həmonə terroristi unsoron ki dəvardə rujon bə etırazəkəyon həmlə kardə bin dəstqirış karde.

Zinə şəv Bəğdadi Əltəhrir meydonədə İraği etırazəkəyon Amerkə və sionist rejimi boydığon otəşon jə.