Xanım Fatiməyi-Zəhra(s.ə) mubarəkə mevludə ruj.

Bı rujonədə dınyo mısılmonə ummət çe Xanım Fatiməyi-Zəhra (s.ə) mubarəkə mevludə ruji ğeyd kardedə. Im tarix İslamə aləmədə ən ləyağətinə rujonədə qıley hisob bedə. Bə ım ruji muğəddəs bıe dəlil əve ki, Xıdavandi-Aləm bə Rəsule-Əkrəm(s.ə.v.s) ım rujədə çe Ğıroni-Kərimi “Kousər” surə nazil kardəşe.

İslami əzizə Peyğəmbər (s.ə.v.s) çand bəjəm ıştə votəyonədə Fatimə (s.ə) bənə “çe dınyo moynəon rəvoşi,  dınyo ən fəzilətinə xanımi, cənnəti ən barzə moynə” tarif əkardi, həmişə əvoti ki, “ çe cənnəti ətrə buy Fatiməku sedəm, kii çey dıli barışto - çımı dıli arıştedə, kii dey deşmenəti bıko - demı deşmenəti kardedə”.

Fatiməye-Zəhra (s.ə) İslamə dinədə idealə, ən ali mənəviyyati ehtiva kardə komilə zənəne. Ey Peyğəmbər (s) məktəbədə de vəhy və Ğıroni tərbiyə səşe. Bı səbəbən muasir zəmonədə çey jimoniku dərs sə har qıley moynə xoşbəxte, əv ıştə xeyzoni səadət və xoşbəxtə roy de Həzrəti Zəhra (s.ə) ruşnə pur kardənine.

İslamazeri.com sayt xəbə dodə ki, Qurcistoni mısılmonon çe Xanım Zəhra (s) mubarək mevlud şəhər və dionədə ğeyd kardəşone. İminə jıqo tədbir Qardabani rayoni Qaracalar diy şodmonə sarayədə dəvuniəşone. Im mərasimədə devləti rəsmiyon, elm və mədəniyyətə xadimon, ictimaiyyəti numayəndəon iştirak kardəşone, çe Qurcistoni Mısılmonon İdarə şeyx  Hacı Ramin İqidov, Şərği Qurçistoni mufti Hacı Yasin Əliyev, Turkiyə Diyanətə Koon Vəzarəti numayəndə Hacı Əhməd Erdəm, Qurcistoni Mısılmonə Jenon İcma sərdar Qulşə Nemətova votemon ehandəşone, çe Həzrəte-Fatimə (s.ə) məğam, şəxsiyyət və fəziləton,  İslamədə ailə mədəniyyət, jenon huğuğon, bə mısılmonə moynəon xas xususiyyəton barədə qəp jəşone. Çəyo məddahon – Vasif Vəsfinur, Səid Həsən, Anar Cəfəri şe`r və ilahion votəşone.

Mərasimi orəxədə bə iştirakəkəon dini jurnal, təğvim, bukleton hədiyyə kardəşone.