İroni ətomiyə sazışi vədə Amerkə bezu bıə.

İroni prezident aparati rəis votışe: anti İron makzimum fişaron əks Amerkə ısət ətomiyə sazışi vədə bezu mandəy.

Bə İrna raporti əsos, Məhmud Vaezi ıştə tojə Twitter mesajədə de İroni ətomiyə sazışi muxalifət karde bənə anti İron hərəkəton nışonə zınəş be və votışe: çand sor heste ki ətomiyə sazış bo İroni deşmənonro bənə mane be ki arəku bardero vey cəhd kardışone.

Tojədən Amerkə Niyoyork Taymz rujnomə ğeydış karde ki Amerkə qıləy xəbisə plani vasitə İroni silah sanksiyaon ləğv bey vəy qətero cəhd kardedə, əv həm qıləy şərayetədə ki bə ətomiyə sazışi əsos ki əmniyyət şura ğətnomə vasitə təsdiğ bıə, anti İron silah sanksiyaon Oktiyabrə manqi 17ku bəpe ləğv bıbu.

İroni xarıci vəzir Muhəmməd Cəvad Zərif həm Amerkə ım cəhd və siyasəti barədə bə Vaşenqtoni rəsmi şəxson tovsiyəş karde ki haniku oğo bıbun iyən royaku dast bıkəşon.

İ Bıə Milləton Təşkilatədə İroni daimə nımoyəndə Məcid Təxterəvançi həm Amerkə ım siyasəti əv həm qılə holədə ki ım kişvər ətomiyə muğaviləku xaric bəy qıləy məsxərə hərəkət bə hisobış varde və votışe: Amerkə de ətomiyə sazışiku xaric bey həmzəman, həm 2231 ğətnomə və həm ıştə ehdəmonon ləğvış karde.