İron Fransə Şarli Hebdo rujnomə bə Xıdo Rəsul(s) ihonəti məhkumış karde.

İroni xarıci vəzarətxonə Fransə Şarli Hebdo nomo rujnomə bə Xıdo Rəsul(s) ihonəti de çiddəti məhkumış karde.

Bə İrna raporti əsos, Səid Xətibzodə təsdiğış karde: Bə Həzrət Muhamməd(s) ya xot har qılə co peyğombəron ihonət karde ğəbul kardənin ni.

İroni xarıci vəzarətxonə sıxanəvot əlovəş karde: Fransə rujnomə ım ihonət amizə hərəkət ki de ozodə bəyoni vavunə əncom bıə, əmələn dınyo Xıdopərəston dıli norohətış karde ki təhrikon kənoədə bə dınyo 1 milyard mısılmoni əğidəon və islamiyə erjon ihonət karde mənodəy.

Səid Xətibzodə oxoədə təkidış karde: ım rujnomə siyasəti əks, ozodə bəyon qıləy erjinə məfhume ki bəpe bəşəriyəti sulhinə jimoni çərçivədə iyən dinon miyono əloğəon xoto istifodə bıbu.

Fransə Şarli Hebdo rujnomə tojədən qıləy ihonət amizə ko vasitə bə İslami əziz qiromiyə Peyğombəri zidd Danimarkaədə miladi 2005-ə sori muntəşir bıə karikatoron ijən çapış karde ki dınyo mısılmonon norohəti iyən əsəboniyəti bois bıə.

Fransə Şarli Hebdo rujnomə siyasət iyən koon sabiğədə jığo bə mısılmonon ihonət və be ehtıroməti karde mətləbon pure.