İron iyən məntəğədə bıə Koronavirusi barədə oxonə xəbəron.

Dəvardə 24 saəti mıddətədə de təəsufi 86 nəfər Koronavirusi mıbtəlo bıə noxəşon İronədə ıştə coni dastiku doəşone ki qırd ısət ım pandemiya nəticədə mardə kəson miğdor bə 56803 nəfər rəsə.

İroni səhiyyə vəzarətxonə elanış karde: tojədən 6016 nəfər bə Koronavirusi mıbtəlo bıə kəs İronədə peydo bin ki çəvonku 631 nəfər hələ noxəşxonəonədən.

İronədə tosə bə ısət 1330411 nəfər Koronavirusi qətəşone ki de xoşbəxtiyəti noxəşon miqdoriku 1119137 nəfəri hal-əhvol çok be və əvon noxəşxonəonku mırəxəs və ozod bıən.

İronədə Korona peyvəndi soxte barədə həm xəbə həm ıme ki İroni bayotexnoloqia mərkəzi rəis votışe ki İroni anti Korona vaksin vey təsirin iyən ko kardə peyvənde.

Sirus Zeynali təkidış karde ki İron ım vaksini istehsolədə bənə Çini mıhəğğiğon zəif bıə virusi texnikiku istifodəş karde.

Hindustonədə həm Covid-19 virus ijən cəmaəti coni qəteydə, xəbə omə ki tojədən ım kişvərədə 13 həzo nəfəriku vey Korona qətəşone ki çəvonku 145 nəfər fəğət dəvardə 24 saəti mıddətədə ıştə coni dastiku doəşone, ım qıle holədəy ki Noyə Dehli ım kişvərədə anti Korona Vaksinasioni bino beyku xəbə doydə.

Tırkiyəku oxonə xəbə ıme ki Dəvardə 24 saəti mıddətədə ijən 6500 nəfər nezi bə Koronavirusi mıbtəlo bıən ki çəvonku 165 nəfər mardən.

Dınyoədə Korona qəte kəson miğdor 95 milyon nəfər iyən mardə kəson ədəd həm 2 milyon nəfəriku vey bıə.

Amerkə de 24 milyon mıbtəlo və 470 həzo nəfər mardə kəs statestikaon cəhəto həmçenan çı Koronavirusi pandemiya behronədə dınyo kişvəron sədrədəy.