Tırkiyədə bıə İroni xarıci vəziri muzakirəon.

İroni xarıci vəzir de tırkiyə prezident vindemon karde cərəyonədə 2 tərəfi, reqional iyən beynəl xalğ mıvzoon barədə muzakirəş karde.

Muhəmməd Cəvad Zərif ıştə reqional muhimmə səfəri 5-ə mərhələdə zinə, Azərbaycan Respublika, Rusiyə, Qurciston və Ermənistoni bəpeşt bə Tırkiyə varid be və de Tırkiyə prezident Rəcəb Təyyeb Ərdoğan iyən Im kişvəri xarıci vəzir Mıvlud Çavuş Oğli vindemon iyən muzakirəş karde.

İroni xarıci vəzir həminə mulağatədə və muzakiron bəpeşt de qıləy tuvitter mesaji vositə Tehron Ankara miyono həmkarion çok və foydəin bə hisobış varde və ğıydış karde ki muzakiron mehvər Suriyə, İrağ və Ğəfğaz məntəğə xususi Ğərəboğ be.

Zərif ın mesajədə təkidış karde ki məntəğədə stabileti icod kardə yeqanə roy həmkarəti və bəyande komək kardeye.

Tırkiyə xarıci vəzir Mıvlud Çavuçoğlo həm muzakiron bəpeşt de Farsi zıvoni muntəşir bıə Tuvitter mesaji ğeydış karde ki muzakiron veyni Suriyə təhəvolaton, İrağ və Fars dıyo barədə be.

Əv əlovəş karde: Cənubi Ğəfğaz məntəğədə daimi otəş kəst fəğət de həmkarəti və koməkon vositə bəpe zəruri surəti dəvom ko.