Ironədə Koronavirusiku oxonə xəbəon.

İroni səhiyyə vəzarətxonə İronədə 1 milyono 229 həzo nəfəriku vey Korona noxəşon çok beyku xəbəş do.

Bə oxonə raporti əsos, dəvardə 24 saəti mıddətədə de təəsufi 79 nəfər Koronavirusi mıbtəlo bıə noxəşon İronədə ıştə coni dastiku doəşone ki qırd ısət ım pandemiya nəticədə mardə kəson miğdor bə 58189 nəfər rəsə.

İroni səhiyyə vəzarətxonə elanış karde: tojədən 6870 nəfər bə Koronavirusi mıbtəlo bıə kəs İronədə peydo bin ki çəvonku 701 nəfər hələ noxəşxonəonədən.

İronədə tosə bə ısət 1438286 nəfər Koronavirusi qətəşone ki de xoşbəxtiyəti noxəşon miqdoriku 1229391 nəfəri hal-əhvol çok be və əvon noxəşxonəonku mırəxəs və ozod bıən.

Dınyoədə Korona qəte kəson miğdor ısət bə 104 milyon nəfər rəsə iyən mardə kəson ədəd həm 2 milyono 300 həzo nəfəriku vey bıə.

Amerkə həmçenan dınyoədə bıə Korona noxəşon iyən mardəkəson statestikaon sədrədəy.