Çe İİR de reqioni devləton əlağə inkişaf kardedə.

İslamə İnğilabi bə peş İroni xalği bə dast vardə hartərəfinə nailiyyət və inkişaf dınyoədə heqemonə siyasət bardə ğıvvon bə təşviş dəğandışe, əvon çand sorone ki, bə İroni əleyh beynəlxalğə ğanunonku bə kəno sanksiyon tətbiğ kardedən ki, çey ım inkişafi vəy bısənon, axır nəticədə ey bəştə mənfir siyasəti tabe karde bızınon.

Əmo İroni xalğ har sor iğtisadi, siyasi , mədəni, elm və hərbi sahədə ıştə inkişafi həniən ziyod kardedə. Bı roədə İroni de ıştə hamsuə devləton, iminə nubədə de Azərbaycanə Respublika hartərəfinə əlağəon hevuj kardeədə marağ hestışe. Sənaye, mədən və ticarəti vəzir Əlirza Rəzm Huseyni Parsabad sənaye mərkəzədə beədə votəşe ki, de Azərbaycanə Respublika marzi həndəvər məntəğəonədə muştərək zavodon inşa karde ro Ərdəbil ostanədə çokə potensial heste. Bı barədə dıqılə devləti hokuməton arədə roziəti bə dast vardə bə peş ım layihə bino noe mumkun bəbe.

İİR Moskvadə səfir Kazem Cəlali de Rusiya di təsərrufati vəziri muavin Serqey Levin`i vindemonədə ğeyd kardəşone ki, tərəfon arədə di təsərrufati məhsulon tədaruki sahədə həmkarəti de ərzağ məhsulon təchizatədə çe ım keşvəron əmniyyəti təmin bəkarde. Bə İRNA doə xəbə istinadən Səfir Cəlali ğeyd kardəşe ki, dəvardə sori İroniku bə Rusiya ixracati ziyod bıe, dıqılə keşvəron arədə ticari əlağəon inkişaf kardovnie ro çokə stimul bə əməl vardedə.

Amerika bə İroni sərt sanksiya elan kardə vəziyyətədə Çin de İroni ıştə ticarəti həniən hevuj kardedə. “Teref.az”i bə “Report”i əsasən nıvıştəşe ki, tosə martə manqi orəxi Cin çe İroniku ışiə nati idxali har ruj bə 856 həzo barel bərosne ki, ımən çe fevralə manqisən 29% veye.