Ərbəini şemon dəvom kardedə.
Ərbəini ruj nez bedə, ımsor ım ğəmvardə ruj de miladi təğvimi bə sentyabri 27-28 minə rujon muvafiğ omedə
İmom Huseyni (ə) məğbərə ziyarət karde ro mısılmonə ummət bə Kərbəlo tərəf piyodə şemon kardedə, de ım əzəmətinə əməli iştə məhəbbəti bəştə əziz-qiramiə imomi izhar kardedə. Hiçən təsaduf ni ki, Ərbəinə mərasim de UNESCO ğərori bənə dınyo mədəni irsi təsdiğ bıə. Hətto de korona pandemiya əlağədar məhdudiyyətonən çe Əhli beyt (ə) aşiğon bə Kərbəlo şəhidon məhəbbət hiçən kam karde zınəş ni. Ponə sori ım mərasimədə iştirak kardə zəvvaron miğdar 14 milyon 500 həzo nəfər bıə.
Imsorən həmonə ənənə dəvom kardedə. İragi hokumətə orğanon bə zəvvaron əmniyyəti, saleməti və səhiyyə tənəvəc mandedən. Zəvvaron dəvardə roon dırozi İmom Huseyn (ə) matəmi xidmətkaron bəvon bepul xorək, ov, şirə təklif kardedən. Bə səhhətış dəqardə zəvvaron həmon dəğiğə tibbi xidmət nişon doe ro amadə mandedən. Çe dınyo tərəğğipərvərə ictimaiyyət çe Ərbəinə zəvvaron xidmətədə mandə bə anədə xoş məraminə odəmon dılısoxtə ehtirami valeh bedən, çe UNESCO Ərbəinə mərasimi bə dınyo mədəniə nailiyyəton siyahi dəğande, dınyo ictimaiyyəti bə ım fəxrvardə hərəkəti doə layığinə ğıyməte.
“Eastnews.org” sayti xəbə doəşe ki, İraği “Həşt Şabi” hərəkati Bağdadi cənub istiğamətədə çe İŞİD –i qıley terrorə dastə məhv kardəşe. Çəvon bə Ərbəin zəvvaron hucum karde nısığşon hestebən.
Kərbəlo şəhidon çılımı bənə matəmi ğeyd kardə ənənə çe Aşura hadisə vağeə bıə hicri təğvimi 61-minə (miladi təğvimi 680-minə) soriku bino bıə. Çəvon ğəbon ziyarət kardə iminə zəvvar çe Cabir ibn Abdullah`i nom tarixədə mandə, ey ım ziyarət çe Aşura faciə 40-minə, yəni Ərbəinə ruji icra kardəşe. Kali rəvayətonədə Kərbəlo əsironən ki, Şamiku bə Mədinə oqardedəbin, həmonə ziyarətədə iştirak karde təsdığ bedə. Çe Əhli beyt (ə) zənənon və İmon Zeynəlabidin (ə) məhz ım ruji Kərbəlo şəhidon məzaron ziyarət karde dair etibarinə tarixiə mənbəon hestin. Hejo bı səbəbən har sor islami ummət Ərbəinə mərasimi Nəcəfiku bə Kərbəlo 80 km roy piyodə şedən, İmom Huseyn (ə) ğəhrəmanəti, həmən fədakarəti, çe Əhli – beyt (ə) kəşə əziyyət və məşəğğəti bə yod vardedən.
Ərbəinə ruji İmom Huseyn (ə) ğəbi ziyarət karde, “Ərbəini ziyarətnomə” hande yolə səvobış heste.
İbrimi Zahirəddin, çe Rusiya Yekaterinburğ şəhəriku, İİR sədo, tolışi radio.
