Rəisi: zalimanə sanksiyaon ləğ bey jintonədə bə harcurnə sazışi dast peydo karde bəbe.
İroni prezident votışe: əqə tərəfon hozzı bıbun ki anti İron sanksiyaon ləğ kon, bo har sazışi imzo kardey imkon bəbe.
Bə İRİB raporti əsos, Seyd İbrohim Rəisi zinə şəv ıştə televezia məxsus mısohibədə de kişvəron rəsmi şəxson vindemon karde məğsədi bo kişvəri mənafe iyən inkişofi zəminə bə hisobış varde və votışe: de co kişvəron rəsmişəxson vindemon karde cərəyonədə sere be ım ki nəticəş bıbu millətiro foydəş ni.
Əv çı Viyana muzakiron oxonə nəticə iyən de İron muzakirə kardey barədə Amerkə tələbon votışe: Amerkə vey faxt bəbe ki de İron sərost muzakirə kardış pidə, əmmo tosə bə ısət de Amerkə muzakirə karde əncom bə ni.
Risi ıştə dıvləti siyasətonış de dınyo həmmə kişvəron muzakirə karde bəyon kardışe və əlovəş karde: har kişvər ki de əmə mıtəğobilə həmkarion fikədə bıbu əmə həm dəy həmkarəti bəkamon, əmmo əloğəon bəpe bə ehteromi əsos bıbu.
İroni prezident bə İoni tərəfo həmohənq xarıci siyosət sterateqiaon dumo kardey işarəş karde və həminə siyosəti çərçivədə bə 15 qılə hamsuyə kişvəronədə bıə zərfiyəton təmərkuz karde bənə İroni muhimmə şivə bə hisobış varde.
Əv bə Maskva səfəri işarəş karde və votışe: maliyə və puli cəhəto de Rusiyə həmfikimon və çəmə nəzə ıme ki dınyoədə Dollari hakımiyət bəpe sə kardə bıbu və əmə bəpe dıştə valyotaon ıştə ticorəti əncom bıdəmon.
Rəisi 2 qılə kişvəri miyono ticarəti tarifon peqəte tələbış karde ki əsosi əmtəə tranziti rost bey bois bıdə.
Əv Maskvaədə həmmə diplomatik və iğtisodi ğərol-hərəkətonış çı İroni milləti mənafe və iğtisodi inkişofi çərçivədə bə hisobış varde.
