Bə Yəməni problemi munasibətədə Ğərbi dıdimə siyasət.

Haft sore ki, Yəmənədə canq dəvom kardedə, beynəlxalğə ictimaiyyət bə səudion əyo kardə həvəşiə əməlon hələən motijə mandedə

Əmo Ukraynadə canq cəmi 1 manqe ki bino bıə, Avropa məmləkəton bə çəvon “kavuə çəşon və zardə muyon” qorə əvoni daima ıştə diğğəti mərkəzədə oqətedən. “İran.ru” İnformasiya Aqentiyyət bə ım məsələ dair dərc kardə məğalə dəvomədə nıvıştedə ki, dəvardə sori İbə Milləton Təşkilat bə Yəmən muharibə dair elan kardə proqnozədə votedəbe ki, bo sori orəxi əyo tələf bıə odəmon miğdar bə 377 həzo bərəse. Həmonə sori oktyabrə manqədə çe İMT bə hırdənon dair aqentiyyətiən bəyon kardəşbe ki, bənə Yəməni məzlumə keşvərədə ım muharibə nəticədə 10 həzo hırdən həlok bıə. Co Bayden 2020 –minə sori ıştə prezidentə entexabatə kampaniyadə vəd kardedəbe ki, bə Yəməni canqi orəx bədo. Əmo prezident bıeku tosə ısət Yəmənədə bə muhasirə vəziyyət eqıniə dinc əhali tale həxədə hiç qıley əməli sıxan votəş ni. Əyo 7 sornə canqi nəticədə 4 milyon nəfər ıştə məskənonku didərqin eqıniə. İbə Ştaton hələən Səydiyyə Ərəbıston çe Yəməni dıyo kəno ərazion bolkadaku dast kəşe dəvət kardəşni ki, bə dinc əhali humanitar koməki rosnie mukun bıbo. Har qıley muharibə dəhşət vardedə, jıqo dəhşət bəvədə həniən qıvonin bedə ki, beynəlxalğə ictimaiyyət bə har canqi çe dıdimə standarton prizmaku diə kardedə. Məğalə orəxədə “İran.ru” bə əhandon de jıqo qıley ritorik parsi muraciət kardedə: “Çe Ğərbi xeyli Kutləviə İnformasiya Vasitəon ıştə reportyoron bə Kiyev dəğandəşone, bəs, məsələn, CNN-i Məğribədə çand qılə perortyor hestışe?”  

Amerikavojə alim Uilyam Biman bə Tehran Times –i musahibədə etiraf kardəşe ki, avropavojon və amerikavojon bə Ukrayna koməki, dey həmrayəti numayiş karde, bə Yəməni və ya Əfğanıstoni koməkisən əfsəl zınedən. Imən Avropa, həmən İbə Ştatonədə irğpərəst və islamofob təmayulon mevcudiyyətiku xəbə dodə. Şubhə ni ki, əvon bə Ukrayna bənə xristianə və avropoidə məmləkəti diə kardedən. Zelenski ğeyrəz İsraili, beynəlxalğə arenadə yekanə devlətə sərdare, ım yəğin ki, qıleyən səbəbe ki, bə co keşvəron munasibətədə bə Ukrayna vey diğğət nişon dodən, bey həmrayəti və komək kardedən.

İbrimi Zahirəddin, çe Rusiya Yekaterinburğ şəhəriku. İİR sədo, tolışi radio.