Dınyoədə İslamofobiyə prossesi har ruj vey bey barədə İroni nota.

Tojədən, İ Bıə Milləton Təşkilatədə İron İslam Respublika daemə nımoyəndə, Məcid Təxterəvançi dınyoədə İslamofobiyə rujbəruj vey bey prossesi barədə notaş do iyən votışe: bə dini etığadon be diğğət bey jintonədə bə kali şəxson tovhinon iyən be ehtıroməti əlovə bey, sulhomizə jimon və milləton miyono dustiyətiro, muhimmə bıhran bə hisob omeydə.

Dəvarəd manqonədə ğərbi kişvəronədə bə islami zidd hərəkəton vey əlovə be.

Tosə bə ısət ğərbi kişvəronədə islamofobiyə hərəkəton iyən bə məçiton və islami mərkəzon həmləon barədə, bo çand kərə sakin bıə mısılmonon ıştə nığılə niqəroni bəyonışon kardə. İyən ım mərkəzon oqəteyro, dıvlətonku əmniyyəti tədbiron nəzərdə qəte tələb kardışone.

Bə İrna raporti əsos, İ Bıə Milləton təşkiloti umumi iclosədə ki nifrət icod kardey vədə muğabilə kardey beynəl xalğə ruji yol qəteyro bərpo bıə, Məcid Təxterəvançi ım ruji nom noeyku ıştə rizoyəti elanış karde iyən votışe: muxtəlifə kişvəronədə, nifrət icod kardey hevujəti, beədoləti və vızməti, yol iyən muhimmə mısibəton bə mısılmonə ictima varid kardəşe.

İ Bıə Milləton Təşkilatədə İron İslam Respublika daemə nımoyəndə, ijən əlovəş do: bə çəy xoto ki kali dıvləton, bə islami zidd qurupon hərəkəton mığubilədə sukut kardən və həmçınin de bə islami zidd bıə mediyaon vositə ım hərəkəton rəvoc doey bıdə, kali kişvəronədə siyosiyə hərəkətoni bənə hicobi məhdudiyət, Kərimə Ğıroni otəş jəey, bə dini simvolon tovhin kardey moşahidə bıdə.

Həminə iclosədə, Məcid Təxterəvançi bə hicobi xoto, mısılmonə jenon iyən kinəon əzob doey mıvzo xususi diğğət kardey vey lozimə ko zıneydə be və votşe: həminə İslamofobiyə hərəkəton icod kardey bois bəbe vızməti hərəkəton əncom doeyro vey çokə muhit icod bıbu ki ictimai vəhdət iyən əmniyyət və rifohro vey ciddiyə təhdid bə hisob omeydə.

Həmçınin Həminə iclosədə, İ Bıə Milləton Təşkilatədə İron İslam Respublika daemə nımoyəndə, sionist rejimi nımoyəndə sıxənon be əsos zıneydə be iyən əlovəş do: ım rejim bə rasistə  siyasəton və nifrət icod kardə rejim məşhure və ım rejimi nımoyəndə de duə sıxanon iyən dave icod kardey xoto, karde zınəş ni ım rejimi siyasəton məxfi ko.

Bə İ Bıə Milləton Təşkilati umumiyə onemononi ğətnomə əsos ki dəvardə sorədə təsdiğ bıə, İyonə manqi 18 minnə ruj bənə nifrət icod kardey vədə muğabilə kardey beynəl xalğə ruji nom noə bəy.