Bə Amerkə tojə sanksiyaon İroni reaksiya

İron İslam Respublika xarıci vəzarətxonə sıxənəvot, Nasır Kənani bə İroni ələyh Amerkə tojə sanksiyaon reaksiya nışoş do.

Zinə, Amerkə xəzinə vəzarətxonə elanış karde ki sanksiya siyohədə kali tojə kəmpaniyaon nomoni ki de İroni rabitəşone, əlovəş karde. ım kampaniyaon, bə İ Bıə Ərəbə Əmirəti, Çin, Malaziya və Sinqapur kişvəron məxsuse.

Dınyoədə Amerkə vey yolə sanksiyaəkəyon bə hisob omeydə, ki bəştə hədəfon və mənafe cəhətədə, bə co kişvəron ələyh muxtəlifə sanksiyaon əncom doeyro vey navəjəne.

Bə Fars aqentiyəti raporti əsos, ımruj sıb, İroni xarıci vəzarətxonə sıxənəvot, həminə barədə votışe: sıpiyə kə, bə sanksiyaon vabəstə bey iyən çəvonku istifodə kardey, Amerkə sultə nizomiku qıləy funqsiya bə hisob omeydə və ım kişvəri dıvləton əvəz bey, çəy metodi əvəz kardəş ni.

İroni xarıci vəzarətxonə sıxənəvot ijən əlovəş do: Baydeni dıvləti rəsmi şəxson, çand kərə Trampi makzimum təziğon siyasəti qıləy məğlub iyən be nəticə siyasət elanışon kardə, əmmo əmələdə ıştən həminə siyasəti idomə iyən hevuj doəşone. anədə ki hətto muzakirəon tojədən bino bey cəhdon prossesiro və bə təvafuğon oqardey xoto, həminə be nəticə və xərobəkə hərəkətiku dast kəşəşon ni.

Kənani təkidış karde: İron İslam Respublika, həm sıpiyə kə bərobərədə, və bə sanksiyaon əncom doey dəvomədə, ğoym və təcili reaksiya nışo bədoe, və həm bə kişvəri iğtisod və ticari, ım sanksiyaon benəticə kardeyro lozimə tədbiron əncom bədoe.

İroni xarıci vəzarətxonə sıxənəvot ıştə sıxənon oxoədə əlovəş do: ım sanksiyaon ovəyz hodisə şəroyetədə bə İroni milləti ələyh icod bıə ki əvon con və moli zərəl-zoiyanonədə ğəror qətəşon be. və ım məsələ İroni koonədə Amerkə mızdorə mahiyət iyən çəy məxsusə nımoyəndə nımoyeşi təsliyət votey oşko surət nışoş do.

Amerkə tojə sanksiyaon qıləy şəroyetədə icod bıə ki ım kişvəri prezident, Co bayden iddeoş kardə be ki hədəfış heste muzakirəon royku, bə atomiyə sazışi təvafuğon, ıştə kişvəri oqardeyro lozimə zəminəon icod ko.

Dəvardə manqonədə, Co Baydeni dıvləti rəsmi şəxson çand kərə de ğoym surət etırofışon kardə ki makzimum təziği siyasət məğlub bıə və votışone ki ğərol bıə Amerkə bə atomiyə sazış obəqardo, əmmo tosə bə ısət bə ım təvafuğon oqardey koonku vəy qətəşone.

İron İslam Respublika bənə qıləy təəhudinə kişvər çand kərə elanış kardə ki de diğğət bə ım ki Amerkə təvafuğon rioyət nıkardə, çən ım Vaşenqtone ki bəpe de sanksiyaon peqətey vositə, bə təvafuğon obəqardo, və lozime Amerkə təəhudon barədə təhğiğ bıbu. həmçınin Tehron təkidış karde ki  Amerkə təvafuği oqardeyro hiç təcil ni.