Viyanaədə muzakirəon sə bey, İroni muzakirəkə heyət bə Tehron obəqarde.
Viyanaədə, anti İron sanksiyaon peqəteyro, de ım dıvrə votımonon sə bey, İroni muzakirəkə heyət bə Tehron obəqarde.
Avqustə manqi 4 minnə ruj yəni Pencşəmbə rujiku, Avstriya paytəxt, Viyanaədə, anti İron zalımonə sanksiyaon peqətey muzakirəon tojə dıvrə bino bıə, və de ım dıvrə votımonon sə bey, İron İslam Respublika muzakirəkə heyət bə Tehron obəqarde.
Həminə cəhətədə, həmmçınin de muzakirəon həmohənqəkə Enrike Mora, votımonon iyən rabitəon dəvom bey holədəy.
Çımiku bənav həm İroni xarıci vəzarətxonə rəsmi şəxsonku qıləyni bə ım nuktə işorəş karde ki muzakirəon həmohənqəkə Enrike Mora, bə muzakirəkə tərəfon çand qılə idea bəyonış karde iyən votışe: iminnə nəzəon iyən cəvobon bə komilə təhğiğon ehtiyoce, və bə Mora iyən co tərəfon, çəmə nəzəon elan bəbe.
Bə İron İslam Respublika vəzarətxonə aliy rəsmi şəxsi votəyon əsos, dəvardə 4 ruji mıddətədə, çand qılə baği mandə məsələon və İroni niqəronion təmin kardey barədə, izdihomin muzakirəon bərpo bıə və həminə votımonon cərəyonədə, de mığobilə tərəfon, İroni mıvğiyət bəyon bıə və kali mıvzoonədə nəticəon aid bıə.
Votımonon həmohənqəkə, Enrike Mora həm i şəmbə şəv, Viyanaədə, sanksiyaon peqətey muzakirəon barədə votəş be: vey rə ım muzakirəon sə bəbe.
İroni xarıci vəzarətxonə sıxənəvot, Nasır Kənani Çafi həm bə Viyana İroni muzakirəkə heyəti səfəri bənav votəş be: ım dıvrə votımononədə ki bənə dəvardə votımonon metodi və de Avropa ittifoği həmohənqi bərpo bəbe, tərəfon səmtiku ideaon planon bəyon bey barədə əcumlə İroni edaştə bıə ideaon barədə sıhbət bəbe.
İroni xarıci vəzarətxonə sıxənəvot, tojədən təkidış karde: İron İslam Respublika irodə ıme ki bə qıləy stabilə təvafuği bırəsi, həmonə təvafuğ ki İroni milləti mənafe himoyəkə iyən çəvon huğuği zimonətəkəy.
Əv ijən umidış do ki mığobilə tərəfon həm de bağimandə məsələon həlli, lozimə ciddi ğərolon bıqəton və votımonon bə inkişof rosniyero, vey təsirinə şəroyeti icod kon.
