Ərbəine Huseyni(ə) mərosimi iştirokiro, İroni sınnion kərvonon hərəkət kardey.
"Xıdo Rəsul(s)-i xandani aşiğon kərvon" ki İroni həmmə məntəğəon sınnion əholi çand qılə ellitaonku şomile, bə Kərbəlo muğəddəsə şəhr səmti hərəkət kardeşone.
Hicri Ğəməri 1444 minnə sori səfə manqi 20, miladi 2022 minnə sori sentiyabri 17, Kərbəloədə şiəyon 3 minnə İmom Həzrət İmom Huseyn(ə) və çəy bəfodorə əshobi şəhodəti 40 minnə ruje, həminə rujədə çand milyon zair İmom Huseyn(ə)-i pokə hərəmi ziyorət kardeyro bə İraği cənubədə bıə Kərbəlo şəhri səfər bəkan.
Dəvardə soronədə, mısılmonon və vo İlahi dinon tərəfdoronku kali, bə İmom Huseyn(ə)-i şəhodətə Ərbəini çand ruj mandə, de şemoni royku Nəcəf iyən İraği co şəhronku ıştəni bə Kərbəlo və İmom Huseyn(ə)-i pokə hərəm rosniyedən.
Bə Tele Rədio aqentiyəti raporti əsos, zinə pencşəmbə, Ərbəine Huseyni(ə) mərosimədə iştirokiro İron İslam Respublika muxtəlifə ostanonku çand qıləsınnion qrup əcumlə alimon və ellitaon və dovtələbonə surətədə bə İraği sərhəddi səmt hərəkət kardışone.
Im kərvon Sistano Bəliçıstan, Rəzəvi Xorasan, Şimoli Xorasan, Qolestan, Kırdıston və Ğərbi Azərbaycan ostanon sınni bıvəonku şomilin.
Əlovə bə Nəcəfe Əşrəf iyən Kərbəlo, Kazımeynədə iştirok, de Suleymaniyə sınnion alimon vindemon, cımə nımojədə iştirok və bə Kufə məçit təşərrof kardey əcumlə İroni sınnion kərvoni bərnoməonku bə hisob omeydə.
Bə həminə raporti əsos,Ərbəine Huseyni(ə) mərosimədə iiştirok kardeyro, və bə Əhle Beyt(Ə)-i hərorətin iyən xıdmət xeyməonədə şiə bıvəon miyono uns qətey əcumlə sınnion kərvoni çəşəçiyə koon iyən hərəkətonin.
Ərbəine Huseyni(ə) siyasi və mədəni adətonku qıləyni və Həzrəte Muhəmməd(s)-i xalisə İslami məktəbi sayədə və bəşəriyəti nicot bə hisob omeydə, bə çəy xotoe ki deşmənon həmişə cəhd kardedən ra şiə və sınni hərorətinə cəmiyəton bə ım yolə ictima rəseyro mane bıbun əmmo hiç vaxt karde zınəşon nıbıən.
Sınnion bənə şiəyon bə Xıdo Rəsul(s)-i xandan məxsusə irodətışon. Tole tarixədə Ərbəine Huseyni(ə) şemonədə sınnion daimə iştirok iyən Ərbəine Huseyni(ə) zairon kərvonon ğəbul kardey həminə iddeoro nışonəy.