ƏmirƏbdullahiyan: İron həmişə Yəməni milləti himoyəkə be.

İroni xarıci vəzir de Yəməni milli nicoti dıvlət muzakirəkə heyəti rəis iyən Ənsarullah sıxənəvoti vindemonədə votışe: İron İslam Respublika həmişə Yəməni milləti irodə iyən tələbonku ıştə himoyədorəti elanış karde.

Bə İrna raporti əsos, zinə rujədə, Yəməni milli nicoti dıvlət muzakirəkə heyəti rəis iyən Ənsarullah sıxənəvot Muhəmməd Əbdulsəlom, bə Tehron səfəri cərəyonədə, de İroni xarıci vəzir Huseyn Əmirəbdullahiyan vindemon iyən votımonış karde.

Im vindemonədə Əmirəbdullahiyan elanış karde Yəmənədə bıə otəşbasti bino bey dəvom peydo kardeyku, İron İslam Respublika Yəməniku himoyə kardəş be, İron ım himoyə stabiləti sulh icod kardeyro muğğəddəmə zıneydə, və umidış do ki de Yəməni mıhosirə komil surətədə peqətey vositə, Yəməni insoni məsələ həl bıbu.

Yəməni milli nicoti dıvlət muzakirəkə heyəti rəis iyən Ənsarullah sıxənəvot ım vindemonədə Yəməni millətiku İron İslam Respublika himoyəonku ğədrdonətiş karde iyən ım kişvəri oxonə təhəvulatonku  bə Əmirəbdullahiyan raportış do.

Muhəmməd Əbdulsəlom, mığobilə tərəfon bədəhdion iyən otəşbasti vey muhimmə uzvonro icra nıbeyku tənğidış karde iyən Yəmənədə harcurnə ədolətinə sulhi bə inkişof rosniyero, Yəməni milləti bəşərdustanə məsələon həl bey zəruri zıneydə.

Çand manq bəbe ki Yəmənədə daveon tərəfon miyono de İ Bıə Milləton Təşkilati vositəçiyəti otəşbast icod bıə, əmmo hər ruj Səudi koalisiya ım otəşbast rioyət nibəbe.

Miladi 2015 minnə sori Martə manqiku Ərəbiston de Amerkə, İ Bıə Əmirəti və çand qılə co kişvəron bə yəməni kişvər hərbi həmləşon kardə və zəmin, dıyo və həvo səmtiku ım kişvəri mıhosirəşon karde.

Tosə bə ısət, Yəmənədə Ərəbiston və çəy mıttəfiğon canqtələbəti 16 həzoku vey yəməni milləti kıştə, çand  da həzo nəfər zəxmin iyən çand milyon nəfər avarə bois bıə.